Latgalīšu tautysdzīmis i latiņamerikaņu ritmi sasavej jaunajā “Ilona Kudina’s BALTIC TRANSIT” albumā
Rokstu sagataveja: portals lakuga.lv
Šudiņ, 18. novembrī, izguojs Bostonā (ASV) dzeivojūšuos latvīšu flautistis Ilonys Kudinis, kurei īt nu Daugovpiļs pusis, apvīneibys “Ilonas Kudina’s BALTIC TRANSIT” albums. Tymā skaņ ari divejis latgalīšu tautysdzīsmis, viestej flautistis publicātuo informaceja.
Jau vaira nakai 20 godu ASV dzeivojūšuos latvīšu flautistis Ilonys Kudinis muzykalais projekts BALTIC TRANSIT ir rodūša sadarbeiba ar izcylim džeza muokslinīkim: pianistu Viktoru Ritovu, bundzinīku Arti Orubu, džeza vokalisti Artu Jēkabsoni i basistu Oskaru Stagnaro (Oscar Stagnaro). Ilonys flautys skaņuos i kompozicejuos jiutama kaisle, humors, skepse, kai ari dzymtuos Latgolys tautiskī motivi.
Jaunajā albumā “Ilona Kudina’s BALTIC TRANSIT”, kurā ir ostoni skaņdorbi, skaņ ari divejis latgalīšu tautysdzīsmis – “Aiz azara augsti kolni” Arta Oruba i “Tuoli dzeivoj muna meiluo” Viktora Ritova apdarē. Albums ir īturāts pasauļa-fjužn muzykys stylā, kurā sasavej latvīšu tautys muzyka, latiņamerikaņu ritmi i dzierkstūšuo Ilonys flauta.
Leidza ar albumu “Ilona Kudina’s BALTIC TRANSIT” publiciejuse videoklipu nu īroksta procesa dzīsmei “Aiz azara augsti kolni”.
Albums īraksteits Latvejis Radejis skaņu studejā, bet vosorys nūslāgumā apvīneibu varēja dzierdēt ari Lūznovys muižys Baltejis džeza festivalā “Škiuņa džezs”. Jaunū albumu var digitali nūpierkt i nūsaklauseit apvīneibys profilā vītnē Bandcamp ITE.
Vaira izzynuot par flautisti Ilonu Kudiņu var sovulaik portala lakuga.lv sagataveitajā intervejā ITE.
