Itūreiz kulturys īsacejumi nedeļai īt nu latgaliski aktivuos i patriotiskuos Ilonys Ratinskys. Nazkod Ilona beja vīns nu tūs cylvāku, kuri bīdreibā “Latgolys Studentu centrs” (niu zynoma kai Latgalīšu kulturys kusteiba “Volūda”) ar vysaiduokom aktivitatem veicynuoja latgalīšu volūdys atpazeistameibu plašuokai sabīdreibys daļai.

Izveiduot sovu dzymtys kūku

Suoc veiduot sovu dzymtys kūku – tai tu dazynuosi, cik lela i stypra ūzula zareņš tu esi! Dzymtys kūka veiduošonā suoc ar babu, dzedu i cytu vacuoku radinīku apzynuošonu – aizeimi, aizbrauc gostūs i pasarunoj, apsaver vacūs foto aļbumus!

Izveidoj voi nūpierc Adventa vaiņuku

Kab svātkus izbaudeit, pyrma vajag tim kuorteigi sasagatavuot, apdareit vysus dorbus i golvonais – sakuortuot sovys dūmys. Ituos četrys nedelis ir breineigs laiks, kab byut ar sevi, ar sovu saimi i īdagtu gaismu sovā i cytu sirdīs. Adventa vaiņuks, veiduots ar sovom rūkom i dobys materialim, byus lobs īsuokums koč kam breinumainam! Tici i vyss pīsapiļdeis!

Izbaudi FUTBOLU!

Obligati nūsaver koč vīnu spēli Pasauļa kausā futbolā 2022! Koč i Latveja napīsadola, tok cerēsim, ka tys koč kod nūtiks. A vysleidz vysā Latvejā ir futbola fani, kas mīļoj itū spēli! Myusu sātā dzeivuosim leidza Argentinai, Portugalei i Horvatejai! Lai izadūd!