Rokstu sagataveja: portals lakuga.lv

26. novembrī 17.00 stuņdēs Lūznovys muižys Kulturys škiunī nūtiks pasuokums “Zīpis”, kurā vairuoki zynomi latgalīši stuosteis par zīpem, kuruos pīdzeivuojuši voi sastruoduojuši sovys privatuos dzeivis voi profesionaluos darbeibys laikā. Pasuokumu organizej kūpradis vīta ar naparostu nūsaukumu – LATGALACTICA. Raudzejom nūskaidruot, kas aiz tuo globojās.

Pasuokumā par sovom zīpem stuosteis akters Juoņs Skutelis, kuozu vadeituoja Lidija Terlanova i narkologs Jezups Korsaks, kai ari gaidoms kaids puorsteiguma elements. Taipat tī varēs baudeit KUUP kopeja dzierīņus i konditorejis izstruoduojumus, kai ari nūpierkt eistys zīpis.

Kai stuosta vīns nu pasuokuma organizatoru – reklamys specialists Raimonds Platacis, ideja par tū rodusēs taišni tod, kod jis pats suocs eksperimentēt ar zīpu taiseišonu burtiskā, na puornastā nūzeimē. “Dūmojūt par prezentaceju, saprotu, ka tū var apvīnuot ar zīpu stuostim – situacejom, kuruos cylvāki ir īsakuluši i kas varbyut pat ir smīkleigys. Kai maņ Juoņs Skutelis saceja – ir puors situacejis, kuru nūtikšonys laikā jis navarēja pat īsadūmuot, ka jis kaidam varātu tū pastuosteit. Niu, piec kaida laika, juos var tikt pastuosteitys cytim, i vysi kūpā par tom var pasasmīt. Tam koč kaidā ziņā ir taids terapeitisks efekts.” Vēļ vīns īmeslis reikuot itaidu pasuokumu bejušys Raimonda sarunys ar cylvākim, kuru redzīņs par Latgolys regionu nav optimistisks. “Jim ruodīs, ka te nikas nanūteik, vyss nūteik Reigā, itei ir depresivuokais regions. Ka jau asam tys depresivuokais regions, tod vajag vairuot smīklus, reikuot pasuokumus, kurūs cylvāki var sasatikt i pasaprīcuot par tū, ka asam, ka myus vīnoj volūda i latgaliskais!” Raimonds plānoj itū pasuokumu veiduot kai cyklu, kas vīnoj taišni latgalīšus.

LATGALACTICA ir platforma, kas vīnoj cylvākus, kuri dora lītys Latgolā. “Tei ir vaira kai taida kūpradis telpa nūvoda lelumā, kas ļaun dareit vysu, kū tu gribi dareit. Nav nikaidu rūbežu, i nivīns nav pasacejs, kai vajag voi navajag. Maņ ruodīs, ka Latgola niu ir forša vīta, kur veiduot jaunu latgalisku skatejumu. Tys, kai es radzu Latgolu, ir cīši saisteits ar tom vierteibom, kas mums te ir. Dzeivisziņa, pasauļa izpratne, mīlesteiba – tam vysam ir juopalīk, tik varbyut ir vārts tū īpakuot laikmeteigā volūdā, marketinga volūdā. Tys ir eksperiments – nikas vēļ nav skaidrs, tok ir vierzeiba iz prīšku. Mums ir cīši forša komanda – motivāti latgalīši, kuri grib itū nūvodu ceļt i saprūt, ka nivīns cyts tū myusu vītā nadareis,” Raimonds nūruoda, ka jim planā ir vēļ ari cytys aktivitatis. Jī struodojūt ari pi vairuoku produktu izstruodis, tok tī nateikūt dūmuots par peļņu, bet mierkis asūt runuot par dorbu kūpā i radeišonys prīcu, kas varātu mudynuot sovys idejis realizēt ari cytim Latgolā dzeivojūšajim. “Tei varātu byut platforma, kas apvīnoj cylvākus, varbyut pat paleidz jim. Dūmoju, ka itys ar laiku varātu byut socialais uzjāmums,” stuosta Raimonds. Jau niu nūteik sadarbeiba ar turisma jūmys puorstuovim i pošvaļdeibom. “Ka mums ir zynuošonys, mes ar tom dolomēs. Radzu, ka pošvaļdeibys bīži nazyna, kai runuot ar sabīdreibu, nazyna, kai veiduot sovu pozicioniejumu marketinga izpratnē. Mes sasateikam, skicejam, prezentejam,” Raimonds pastreipoj, ka LATGALACTICA nastruodoj tik pi produktu veiduošonys.

Deļkuo tik naparosts nūsaukums – LATGALACTICA? “Mes asam taidi jaudeigi vīnsātnīki. Asu bejs pi daudzu latgalīšu – kotra tei sāta ir kai atseviška planeta. Mes te Latgolā kotrs riņkojam pa sovu orbitu koč kaidā ziņā. Bet ir taids lels Vysums, galaktika, pa kuru mes vysi riņkojam kūpā vīnā vierzīnī i uotrumā. Kosmosa tema cīši atvīgloj dūmuošonu – tu vīnkuorši saprūti, ka vari dareit vysu, vīnkuorši radeit tū, kū tu gribi.”

Beletus iz pasuokumu var nūpierkt ITE.