Rokstu sagataveja: portals lakuga.lv

1. decembrī Aglyunys Rodūšūs industreju centrā (Aglyunys RIC) Latgolys Turisma konferencē i Turisma bolvu 2022 pasniegšonā sasatyka Latvejis i Latgolys turisma profesionali.

Itūgod Latgolys Turisma konferencē i Turisma goda bolvys 2022 pasuokumā pīsadaleja Latvejis i Latgolys turisma eksperti i praktiki, tymā skaitā ari Latvejis Investiceju atteisteibys agenturys Turisma departamenta (LIAA Turisma departaments) vadeituoja Inese Šīrava, Rodūšuos digitaluos agenturys WRONG socialūs medeju nūdalis vadeituojs Vilhelms Meisters, Latgolys Turisma asociacejis prīšksādātuoja Jelena Kijaško, Latvejis Universitatis pietnīks i Latvejis Ekoturisma savīneibys puorstuovs Ēriks Leitis, pīdzeivuojumu organizacejis “PostNos” puorstuovs Valdis Vītuoliņš (Vītoliņš), kai ari cyti turisma nūzaris eksperti.
Konferenci i bolvu pasniegšonys ceremoneju organizej LIAA Turisma departaments i Latgolys Turisma asociaceja. Pasuokuma īrokstu dreizumā varēs nūsavērt asociacejis Youtube kontā Latgale.travel.

Apkūpojūt turisma konferencē izskaniejušuos idejis i sacynuojumus – turisma nūzare lānam, tok suoc atsakūpt piec pandemejis ītekmis, i regionā pādejūs div godu laikā radeiti 28 jauni ar turismu saisteiti pīduovuojumi. Latgolys Turisma asociaceja turpynoj planveideigi eistynuot regionu popularizejūšys aktivitatis, vysapyrma jau vītejā Latvejis leminī, tok ari vairuokūs prioritarūs uorzemu mierka tiergūs. Latgolys Turisma asociaceja ir LIAA Turisma departamenta regionalais partners, i, pasasokūt kvalitativajai sadarbeibai nacionaluo leimina turisma politikys eistynuošonā, Latgolys regions nūsastyprynoj kai atpazeistams i interesants turisma golamierkis.

Itūgod iz Turisma bolvu 2022 septeņuos nominacejuos pretendēja 34 Latgolys turisma uzjiemieji. Bolstūtēs iz žurejis viertejumu, Goda bolvys 2022 sajiemieji ir:

• Turisma profesionaļs – gide Irēna Kjarkuža (Preiļu nūvods)
• Lobuokuo turisma mītne piļsātā – “VinService” apartamenti (Rēzekne)
• Lobuokuo turisma mītne laukūs – Lelbornis muiža (Augšdaugovys nūvods)
• Lobuokais jaunais turisma objekts – atpyutys i izklaidis parks “Škladi” (Bolvu nūvods)
• Goda turisma uzjiemiejs – “Organic Products” (Ludzys nūvods)
• Lobuokais turisma produkts – Leivuona Stykla i amatnīceibys centrs (Leivuona nūvods)
• Izcileibys bolva turismā – Zyrga sāta “Klajumi” (Kruoslovys nūvods).

Latgolys Turisma asociaceja soka paļdis vysim lektorim, Preiļu nūvodam, Aglyunys Rodūšūs industreju centram, LIAA Turisma departamentam, fotografam Ralfam Punānam, dekoratorei Dignai Vilcānei i sevkuram regiona turisma uzjiemiejam, kurs nas Latgolys vuordu plašuok pasaulī.