Rokstu sagataveja: portals lakuga.lv

Šudiņ, 6. decembrī, 22.00 stuņdēs LTV1 kinu cyklā “Latvijas kods” varēs nūsavērt dokumentalū eiskinu “Einaratīvs”, kuruos režisore ir Latvejis Kulturys akademejis studente Betija Zvejniece. “Einaratīvs” ir unikals stuostejuma paveids, kas viestej par Preiļu dzejnīka Eināra Pelša dzeivi. Kinys veiduošonā īsasaista ari pats varūņs, aizdūdūt vaicuojumu – kū myusu dīnuos nūzeimej byut autentiskam dzeivē i muokslā?

Einārs Pelšs dzeju ar puortraukumim roksta vaira nakai 40 godu, jam izdūti vairuoki dzejis kruojumi, nu kurūs pyrmais ir tradicionals, nu pādejī – piļneigs avangards, par pīmāru, dzejis kartys, ceglys, gruomota bez puslopu i tml. Pelšs roksta ari latgaliski, juo dorbus var puorskaiteit ari portalā lakuga.lv ITE. Dzejnīka eksperimentalajūs kruojumūs izmontuotys na viņ raksteituo vuorda, nu ari dažaidu grafisku i škārsteiklā atrastu zeimu īspiejis, taidā veidā padorūt plotuokus latvīšu myusu dīnu dzejis rūbežus. Gastejūt pi Eināra Pelša Preiļūs, vairuoku Latvejis dzejnīki ir sataisejuši jaunu dzejis vierzīni – Preiļu konceptualismu. Ar tū gols golā ari Latvejā aktualizāti konceptuali dzejis izteiksmis leidzekli i formali eksperimenti dzejā. Preiļu konceptualisma puorstuovi itūšaļt ir zynomuokī Latvejis dzejnīki, nu kurūs leluokuo daļa ir ari literaturzynuotnīki i pietnīki. “Einaratīvā” var izzynuot ari, kū par itū vierzīni dūmoj pats Pelšs.

Kai jau kinys anotacejā nūruoda tuos veiduotuoji, nūsaukums “Einaratīvs” apzeimoj eipašu stuostejuma paveidu, kas viestej par Eināra Pelša dzeivi. Kinā ituo narativa veiduošonā īsasaista ari pats Pelšs. Kai “Einaratīva” eipašajā seansā “Kino Bize” stuosteja režisore Betija Zvejniece, tys, ka jis pīkrits itai kinai, bejuse apstuokļu sakriteiba, tok Pelšu īinteresiejuse vareiba pošam byut daļai nu tuos veiduotuoju. Tys radzams ari kinys titrūs, kur par scenareja autorim nūsaukta vysa tuos komanda. Eipašais narativs teik akcentāts ari kinys vizualajā stylā. Operators Dāvids Smiltiņš fiļmiešonā izmontuojs ostonis dažaidys kamerys, tai eistynojūt režisoris suokuma īceri filmu daleit ostoņuos daļuos, kas paruoda ostoņus Pelša dzejūļu kruojumus – ar kotru nu tūs jis palīk vys konceptualuoks.

“Einaratīvs” ir tuos režisoris Betijis Zvejniecis kursa dorbs, jei vēļ studej Latvejis Kulturys akademejā. Kina veiduota sadarbeibā ar “Vides filmu studiju” i konkursā “Latvijas kods. Latvija šodien” tykuse pīcu lobuokūs ideju vydā, kas ari tykušys realizātys i paruodeitys LTV1.

Kotru godu LTV kinu cykla “Latvijas kods” mierkis ir padzilinuoti pieteit ituos dīnys Latvejis realitati. 2022. goda filmu izlase pīduovoj daudzveideigu Latvejis myusu laika portretiejumu, atsadzūt itam laikmatam rakstureigus paradoksus, fenomenus i nūvārojumus. Ituo gods kinu temuos dominēs pylsūniska i sociala leidzdaleiba, kulturys montuojums i sabīdreibys pošreflekseja.

“Einaratīvs” nav pyrmais stuosts par Latgolys cylvākim, kas taps konkursā “Latvijas kods. Latvija šodien”. 2019. godā sataiseits stuosts “Prīsters” par prīsteri Rinaldu Broku, bet 2016. godā pyrmizruodi pīdzeivuoja Daiņa Kļavys kina “Runātāji” par latvīšu volūdys dažaideibu. “Runātāji” sovulaik sajēme ari Latgalīšu kulturys goda bolvu “Boņuks 2016” par lobuokū snāgumu audiovizualajā muokslā.