Rokstu sagataveja: portals lakuga.lv

Divarpus mienešu piec Saeimys vieliešonu niu, 14. decembrī, ir apstyprynuota jaunuo vaļdeiba, kuru veidoj treis politiskī spāki: “Jaunā Vienotība” (JV), “Apvienotais saraksts” (AP) i “Nacionālā apvienība” (NA). Par uzticeibys izsaceišonu jaunajai vaļdeibai bolsuoja 54 Saeimys deputati, pret beja 37. Apsavērem vaļdeibys deklaracejā par Artura Krišjāņa Kariņa vadeituo Ministru kabineta īcerātū darbeibu i sūlejumim deļ Latgolys regiona, kas tīšā veidā atsatīc iz kulturys i volūdys jūmom.

Sovā uzrunā 14. Saeimys deputats Krišjānis Kariņš eipašu akcentu lyka iz atseviškom jūmom, kurys byus ituos vaļdeibys prioritarī vaicuojumi, tymā storpā: vaļsts drūseiba, izgleiteiba, energetika, konkurētspieja i eksporta veicynuošona, dzeivis kvalitate, tymā skaitā ari veseleibys apryupis kvalitate i daīmameiba.

Deklaraceja ir sevkurys jaunuos vaļdeibys pamatnūstuodņu dokuments, kurā teik atrunuoti byutiskuokī vaicuojumi, iz kuru pamata teik baļsteits vaļdeibys dorbs. Dokumentā kūpumā ir 328 punkti, nu kuru 57. punktā varim skaiteit, ka jaunuo vaļdeiba apsajam saglobuot i atteisteit Latvejis lingvistiskū boguoteibu, atteistūt i nūstyprynojūt latgalīšu rokstu volūdu i veicynojūt lībīšu volūdys vitalitati, tymā storpā nūdrūsynojūt latgalīšu volūdys i nūvodvuiceibys (latgalīšu volūdā) vuiceibys kai Latgolā, tai i uorpus tuos.

Sovpus 318. punktā varim skaiteit, ka vysmoz nuokušūs četrus godus tiks veicynuotys latgalīšu rokstu volūdys vuiceibys, kai ari lītuojums publiskajūs pasuokumūs, informativajā telpā (tymā storpā tiks veicynuots ari raidejumu skaita pīaugums sabīdryskūs i komercialūs medeju saturā) i kulturvidē Latvejā.

Nūslāgumā 325. punktā varim skaiteit, ka tiks paplašynuota Medeju atbolsta fonda darbeiba, atbolstūt nacionalūs medejus, snādzūt atbolstu regionalajim medejim, eipaši Latgolys regionā, i diasporys medejim, rodūt prīšknūsacejumus daudzveideigai, kvalitativai i drūsai informativajai videi, kai saturiski, tai tehnologiski rūsynojūt medeju kritiku i medeju organizaceju storptautyskū teikluošonūs.