Kū var skaiteit jaunajā “Tāvu zemes kalendarā” i “Olūtā”
Rokstu sagataveja: portals lakuga.lv
Kai jau goda beiguos īrosts, Latgolys Kulturys centra izdevnīceibā izguojuse kulturviesturiskuo i literaruo godagruomota “Tāvu zemes kalendars 2023” i literaturas almanaha “Olūts” kuortejais laidīņs.
“Tāvu zemes kalendarā”, kai vysod, atrūnams kalendarejs i astronomiska informaceja, Rēzeknis–Aglyunys diecezis gareidznīku saroksts, roksti par lauksaimisteibys, medicinys, arheologejis, viesturis, kulturviesturis, volūdys, nūvodpietnīceibys vaicuojumim, kai ari literatura, kritika i publicistika. Taipat kalendarā ir ari nūdaļa “In memoriam” par naseņ myrušim izcylim Latgolys cylvākim.
Nu “Tāvu zemes kalendara 2023” satura var izceļt vairuokus arheologa Jura Urtāna rokstus par vysaiduokim piļskolnim, kai ari pietneicys Lilijis Limanis rokstu par Andryva Jūrdža gruomotom Latvejis Nacionalajā bibliotekā. Natryukst ari stuostu par vītejū viesturi, pīmāram, viesturis školuotuoja Marija Labanovska rakstejuse kai par Kuorsovys katuoļu bazneicom, tai kolhozu dybynuošonu Mērdzinis pusē. Taipat vairuoki autori doluos sovu radinīku atmiņuos par rakstnīku Jezupu Kindzuli.
Sovpus literaturys almanahā “Olūts” var skaiteit taidu latgalīšu autoru kai Ilze Keiša, Jūlijs Trōps, Lilija Limane, Helēna Kulincāne, Romons Spaitāns, Voldemārs Voguls, Rūdolfs Linužs, Ernests Vilcāns, Pīters Meikstums, Imants Zeltiņš, Oskars Seiksts i Andris Pelšs jaunuokūs dzejis, prozys i dramaturgejis dorbus. Taipat “Olūtā” publicāts ari rakstnīka Jezupa Kindzuļa (1883-1941) stuosts “Ar krystu pret Kristu”.
Latgolys Kulturys centra izdevnīceiba ari aicynoj autorus īsnēgt dorbus jau cyta gods “Tāvu zemes kalendaram” i “Olūtam”. Dorbi almanaham juoīsnādz leidz 15. janvaram, bet kalendaram – leidz martam. Dorbus lyudz īsyuteit pa e-postu: lkcizdevnieciba@apollo.lv , pa postu iz adresi: Latgolas Kulturas centra izdevnīceiba, Baznīcas iela 28, Rēzekne, LV-4601, voi atnasūt dorbu iz izdevnīceibu.
