Rokstu sagataveja: portals lakuga.lv

Etnomuzykys apvīneiba “Muosys”, kurā muzicej treis muosys i reizē profesionalys muzikis, izdavuse sovu debejis albumu “Ceļā”. Jaunajā albumā vydā ir treispadsmit kompozicejis – latgalīšu tautysdzīšmu aranžejis i grupys originalmuzyka – tūs skaniešonā sasavej grupys latvīšu i skandinavu tradicionaluos (i akademiskuos) muzykys pīredze, viestej grupys puorstuovi.

Grupā-etnomuzykys apvīneibā “Muosys” muzicej treis profesionalys muzikis, kurys reizē ir ari muosys, – Laima Maslova, Liene Brence i Marta Igaune. Apvīneiba rodusēs i darbeibu aizsuokuse 2016. godā leidza ar uzastuošonu Igauņu saimis albuma prezentacejis koncertā “Vysi zīdi pļaveņā” Latgolys viestnīceibā GORS. Koncerts deve impulsu muziķu tuoluokajai darbeibai – cieškuok sasatikt i muzicēt taišni trejūs.

Ituo gods augusta golā grupa publicēja pyrmū albuma viesti – videoklipu dzīsmei “Vysys dīnenis zynuoju”, bet niu, goda golā, sasadorbojūt ar bīdreibu “Latgolys Producentu Grupa”, teik publicāts kai digitals, tai CD formata albums “Ceļā’” . Albuma digitalū verseju var nūsaklauseit grupys “Muosys” profilā Spotify ITE. Taipat 2023. gods 18. februarī “Muosys” aicynoj iz albuma prezentacejis koncertu Rēzeknis nūvoda Lūznovys muižā.

“Ceļā” skaņdorbus pamatā taisejuse etnomuzykologe i grupys “Muosys” vejūļneica Liene Brence, kurei dzīšmu muzykalū redzīni dabuojuse dobys skotūs, sovys dzymtus styprajuos saknēs, bierneibys stuostūs, kai ari baroka i skandinavu tradicionaluos muzykys intonacejuos. Albuma īroksts padareits Rēzeknē, Eināra Lipska skaņu studejā, bet tuo grafiskū dizainu radejs Artūrs Skrebeļs, fotografejis – Lelde Deksne.

Par jaunū albumu tuo skaņdorbu autore Liene Brence soka: “Albums “Ceļā” ir simboliskys stuosts par tū, kai mes kai muosys īmam vīna pi ūrys, kai asam atsagrīzušys Latgolā, kaids kurai nu myusu bejs dzeivis ceļš, ari tys ceļš, kū mes niu dorim kasdīnā, kai kotra asam atrodušys sovu dzeivisbīdru, kaids ir myusu mīlesteibys ceļš.”

Albuma “Ceļā” īrokstu i izdūšonu atbaļstejuse Vaļsts kulturkapitala fonda Latgolys kulturys programa, kurū eistynoj Latgolys regiona atteisteibys agentura, bet finansiali atbolsta AS “Latvijas valsts meži”.