Publicātys Atašīnis i cytu vītu daņčim veļteitys metodiskuos būrtneicys
Rokstu sagataveja: portals lakuga.lv
2021. goda beiguos bīdreiba “Danču krātuve” pabeidze dorbu pi leluokuos Latvejā doncojamūs daņču būrtneicu kolekcejis e-būrtneicu formatā, kas ir breivi daīmama sevkuram daņču kulturys interesentam Daņču kruotivis platformā ITE. Ituo gods beiguos kolekceja ir papyldynuota ar četrom jaunom būrtneicom, tūs skaitā vīna, kas veļteita Atašīnis daņčim.
Piec vaira nakai sešu godu pietnīceibys dorba, bīdreiba “Danču krātuve” publicej vēļ četrys e-būrtneicys: Vydzemis daņči, Lībīšu daņči i rūtalis, Sielejis daņči i rūtalis i Atašīnis daņči.
Atašīnis daņču būrtneicys “Moza beju, gonūs guoju” pamatā ir Valentīnys Mičulis (1934–2015) vuoktais kruojums, dorbojūtīs foklorys kūpā “Vīraksne”. Tī atrūnami kai plašuokai publikai nazynomi daņči, tai ari īmeiļuoti daņči – “Syla Jurs”, “Syla Ješka” i “Atašīnis suseklis”. Sovpus Sielejis daņču i rūtaļu būrtneicā atspīgeļuotys Sielejis pusē doncuotī daņči, tymā storpā ari tī, kas īguojuši nu Leitovys pusis. Itei ir pyrmuo reize, kod Sielejis pusis daņči ir apkūpuoti atseviškā būrtneicā.
2021. godā tyka izdūta būrtneica Latgolys daņči ‘’Vysus darbus padareju’’. Latgolys daņču būrtneicā daņču dzīdamī panti ir kai latvīšu literarajā volūdā, tai latgaliski. Izdavuma autori Sandis Zučiks, Daina Kjakste i Raitis Sondors pīzeist, ka jim ruodīs, ka Latgolys daņču montuojums ir vīns nu boguotuokūs kai melodeju, tai tekstu i pošu daņču nūrišu ziņā. Vaira par Latgolys daņču būrtneicu skaiti ITE.
Sovpus ituo gods junī piec treis godu dorba bīdreiba “Danču krātuve”, Daugovpiļs folklorys kūpa “Svātra” i Eināra Lipska īrokstu studeja Rēzeknē ir sagatavejuši i izdavuši daņču gruomateņu-albumu “Latgolys daņči i na tik”, kurymā apkūpuotys 20 Latgolys pusē pīraksteitys danču melodejis i aproksti, vaira skaiti ITE.
Niu publicātuos četrys būrtneicys ir daļa nu “Danču krātuvis” būrtneicu kolekcejis, kūpumā ir 10 būrtneicys, kas veidoj leluokū Latvejā doncuotū daņču kulturviesturiskū atspīgeļuojumu. Vysi materiali ir breivi daīmami “Danču krātuvis” škārsteikla lopā ITE.
