Rokstu sagataveja: portals lakuga.lv

Bolvu nūvoda Namaterialuos Kulturys montuojuma centrs “Upīte” ir gondreiž pabeidzs dorbu pi nūvodpietnīka, folklorista i literata Ontona Slišāna (1948–2010) stuosteitūs puorsoku atjaunuošonys, apkūpuošonys i īrakstiešonys audio formatā, kai ari tuos tiks izdūtys ilustrātā puorsoku gruomotā.

Nu 2022. goda juļa Upītē turpynojās aktivs dorbs pi Ontona Slišāna puorsoku īraksteišonys myusdīneigā audio formatā. Da šam Ontona Slišāna poša izdūmuotuos i stuosteituos puorsokys nikur nabeja pīraksteitys, deļtam lelu dorbu ir uzajāmuse Slišāna meita, ari literate Māreite Slišāne, kura apkūpuoja vysu, t. s., vacika aba Ontona Slišāna bārnu i mozbārnu atmiņu druponys par juo stuostejumim i saveja tuos desmit puorsokuos. Projekts ir eistynuots ar Vaļsts kulturkapitala fonda atbolstu.

Projekta vadeituojs Andris Slišāns par īceri publicēt Ontona Slišāna puorsokys stuosta: “Pyrmuos puorsokas saraksteit beja vīnkuoršuok, tuoļuok jau sarežgeituok partū, ka kotram nu myusu atmiņā palics viņ pa kaidam mozam gobolam, vīnā reizē muns vacuokais dāls Domeniks pavysam najauši atguoduoja vīnu teikumu i tai nazkuo aizguoja vysa puorsoka.”

Puorsoku pīraksteituoja Mārīte Slišāne pīzeist, ka tei beja kai vareiba atsagrīzt bierneibā i sovā veidā sajust tūs laiku gaisūtni i emocejis. “Ar bārna pruotu, puorsokas uztver tai, a niu kuo pīaugušais pavusam sovaižuok. Bet paļdīs bruoļam par ideju i dūtū īspieju. Jo es otkon tuodā veidā sasatyku ar tātu i sasatyku ar sevi. Kotrys teksts, kū mes puorstuostam, puorrokstam nikod nabyus identisks pyrmolūtam, deļtam cīši raudzeju pīsatyvuot tātam, bet saprūtu, ka daudz kas byus nu manis pošys, jo kotrys mes puorsoku uztveram sovaižuok,” tai Māreite. Jei ari pīmatynoj, ka saimei ir sovs Whatsapp čats, kur kotrs koč idejiski raudzeja atguoduot kaidu puorsoku dalis, gryutuokais nu vysa dorba asūt bejuse volūdys izviele, partū ka cīši gribiejīs atainuot puorsuokys taišni tai, kai tuos tyka runuojs Ontons Slišāns, tok niu pīrokstūt sasajauc kūpā vuiceituo latgalīšu volūda i tys, kai tyka runuots saimē, skaidroj Mārīte.

Kotra nu puorsoku ir aptyvai 12–14 minotu gara, kotrai ir ari sovs īrunuotuojs, tūs vydā ir Domeniks Slišāns, Inga Misāne-Grasberga, Kristaps Rasims, Raimonds Logins, Ilga Šuplinska, Liene Skrebinska, Helēna Slišāne i cyti. Puorsoku vizualais muokslinīks – Jēkabs Slišāns, bet puorsokys īraksteitys Māra Keiša īrokstu studejā “Bigmaar’s Records” Upītē.

Andris Slišāns ari papyldynoj, ka goda beiguos tyka apstyprynuots vēļ vīns Kulturys ministrejis i Latvejis Nacionaluo kulturys centra projekts, pasasokūt kuram byus vareiba izdūt ap 150 puslopu bīzu ilustrātu itūs puorsoku gruomotu. Taipat ir nūceja, ka puorsokys latgaliski izskanēs ari Latvejis Radejā 1 laikā, kod kotru vokoru skaņ “Labu nakti – pasakas”.

Vysys puorsokys jau teik publicātys i ir vareiba nūsaklauseit Youtube kontā ITE.