Bīdreiba “LgSC” i latgalīšu kulturys ziņu portals lakuga.lv reikoj akceju “Lagalīšu volūdai draudzeiga vīta”, kab veicynuotu latgalīšu rokstu volūdys lītuošonu publiskajā telpā Latgolā i cytur Latvejā i pasaulī.
KAS TYS IR?
Akcejis “Latgalīšu volūdai draudzeiga vīta” mierkis ir mudynuot latgalīšus kasdīnys saziņā izmontuot dzymtū volūdu, kai ari veicynuot sabīdreibys izpratni par latgalīšu volūdys vierteibu i pozitivu attīksmi pret jū.
Sovu pīsadaleišonu akcejā i vēlmi aicynuot klientus, sadarbeibys partnerus i cytus interesentus saziņā vaira izmontuot latgalīšu volūdu, uzjāmumi, organizacejis, vaļsts i pošvaļdeibu īstuodis aicynuoti atzeimēt ar eipašys uzleimis dalikšonu publiski radzamā vītā, pīmāram, iz īejis durovu. Uzleimis sajimšona nauzlīk nikaidus pīnuokumus i saisteibys. Tū sajāmušuos vītys ir atzeimuotys eipašā kartē.
Ideja par atpazeistameibys zemi “Latgalīšu volūdai draudzeiga vīta” rodusēs jau pyrma laika, tok kai akceja aizsuokta 2020. godā. Itaida veida aktivitatis – aicynuot kasdīnā i sadzeivē vaira lītuot kaida regiona dzeivuotuoju dzymtū volūdu ar eipašu vizualūs zeimu paleidzeibu – ir ari cytur pasaulī.
KAI VAR PĪSASACEIT?
Pīsateikt pīsadaleišonai akcejā var, aizpyldūt anketu ITE. Anketā var nūruodeit ari tū, voi gribit sajimt akcejis uzleimi. Uzleimis sajimšona naizlīk nikaidus pīnuokumus i saisteibys – pīsadaleišona akcejā i pozitivys attīksmis pret latgalīšu volūdu pausšona ir akcejis dalinīka breiva izvēle.
Uzleimi var lītuot ari digitalā formatā, kai ari izdrukuot i izmontuot piec sovu īskotu, ka tī nav pretrunā ar akcejis ideju. Uzleimi aizlīgts puordūt, ari tod, ka persona tuos izgataveišonā investiejuse sovus leidzekļus. Uzleime lejupīluodiešonai ITE.
KAS AKCEJĀ JUODORA?
Juobyut draudzeigim latgalīšu volūdai! Tys var izapaust kai īspieja ar klientim sasarunuot latgaliski, latgaliskys produkcejis, suveniru, pakolpuojumu pīduovuošona, eipašys akcejis klientim, kurī sasazynoj latgaliski, latgalisku pasuokumu reikuošona, saziņa sovā vydā latgaliski, raksteišona latgaliski publicitatis materialūs i teiklūs i cyti veidi, kas akcejis dalinīkam var īīt pruotā.
Atbolstu latgalīšu pareizraksteibys vaicuojumūs (da 1000 rokstzeimu bezmoksys) vysod gotovi nūdrūsynuot bīdreibys “LgSC” aktivisti i portala lakuga.lv komanda. Sasazynuot i aizdūt vaicuojumus, lyugt paleidzeibu teksta puorsavieršonā var, rokstūt info@lakuga.lv. Taipat var izmontuot ari Vaļsts volūdys centra latgalīšu volūdys lingvista paleidzeibu, zvonūt konsultantam pa telefonu 67334627 ci nūsyutūt pīprasejumu iz e-posta adresi pasts@vvc.gov.lv.
ES JAU ASU DALINĪKS. KAIDS MAŅ NU TUO LOBUMS?
Gūds, slave i lela pateiceiba! Pīsadaleišona akcejā ir breivpruoteiga i ar tū kotrys dalinīks pauž atbolstu latgalīšu volūdai. Akcejis reikuotuoji dalinīkim pīduovoj papyldu publicitatis īspiejis – īkļaušonu akcejis kartē (ar aprokstu i biļdem), publicitati bīdreibys “LgSC” i portala lakuga.lv socialajūs teiklūs (Facebook, Instagram, Twitter i TikTok), stuostūt sabīdreibai par vītom Latgolā, Latvejā i cytur pasaulī, kuruos var dzierdēt, redzēt voi kai cytaiž pīdzeivuot latgalīšu volūdu, kai ari īspieju pīsadaleit akcejis eipašajuos aktivitatēs (spēlē, akcejis ceļvedī i cytuos).
Akcejis asūšuo daleibnīka anketu datu atjaunuošonai i papyldynuošonai var aizpiļdeit ITE.
Akceja “Latgalīšu volūdai draudzeiga vīta” ir vīna nu latgalīšu kulturys kusteibys “Volūda” projekta “Latgaliskuos kulturvidis styprynuošona: sabīdreiba, izpratne i īsaiste” aktivitašu, kurys 2023. i 2024. godā atbolsta Sabīdreibys integracejis fonds nu Kulturys ministrejis daškiertūs Latvejis vaļsts budžeta leidzekļu.
#LTGdraudzeigs RĒZĒKNĒ
Latgalīšu volūdai draudzeigūs vītu izzynuošonys spēle Rēzeknē. Vaira informacejis ITE.
ĪPAZEISTI LATGALĪŠU VOLŪDAI DRAUDZEIGUOS VĪTYS CAUR TIKTOK:
Veikals-salons “Lāde” akcejā “Latgalīšu volūdai draudzeiga vīta” īsasaista jau nu 2020. goda. Ir cīši lela prīca, ka latgalīšu volūda teik lītuota na tik iz suvenirim, bet ari kasdīnys saziņā ar klientim. Kod ej uz veikalu, naaizmiersti runuot #latgaliski ! #NVOfonds2022#Latgale
Paļdis Rekovys vydsškolai, ka šūvosor uzjēme myusu atzolīšus pi seve! Paļdis povuoreitem par gordajim iedīnim i lobū attīksmi! Asam puorlīcynuoti, ka Rekovys vydsškola ir latgalīšu volūdai draudzeiga. 🥳💛 #latgaliski#NVOfonds2022#Latgola
Lūznovys muiža vēļ šudiņ i reit aicynoj iz Baļtejis džeza festivalu “Škiuņa džezs”. Lūznovys muižā kotru dīnu vari sadzierdēt, saredzēt i salaseit latgaliskū. Brauc gostūs! #latgaliski#Latgola#Latgale#LūznavasMuiža#NVOfonds2022
Latgolys kulturviesturis muzejā na tik vari apsavērt dažaidys pastuoveiguos ekspzicejis, no ari jaunys tematiskuos izstuodis kotru mienesi. Muzejs ari ir atvārts sadarbeibai, par pīmāru, 7. oktobrī ite nūtyka Antoninys Masiļūnis povuoru gruomotys attaiseišonys svātki. Īsacejums: Ka īsi iz muzeju, drūsi izmontoj audiogidu latgaliski! #NVOfonds2022#latgaliski#Rēzekne#Latgola#Latgale
1996. godā dybynuotū Skryndu dzymtys muzeju var drūsai saukt par cīši latgalisku vītu. Jūs miseja ir na tik popularizēt īvāruojamuos Skryndu dzymtys, kurys radzamuokī puorstuovi ir Latgolys sabīdryskī darbinīki gareidznīki Benedikts (1869-1947) i Kazimirs (1875-1919), kai ari jūs bruoļs uorsts Ontons (1881-1918) Skryndys, montuojumu, bet ari sovā veidā turpynuot jūs aizsuoktū dorbu. #NVOfonds2022#latgaliski#Latgola#Latgale
Cikom ir snīgs, tikom brauc izbaudeit šmukū Sarkaņkolna apleicīni. 🗻 Ka namuoki braukt ar slēpem⛷ voi snīgadieli🏂, nasasatrauc, Haralds tevi īvuiceis! 💪🏻
Veikals “Cymuss. Radeits Latgolā” ir lauku lobumu veikals Ludzā, kurā var nūpierkt vīteju muojražuotuoju, lauksaimnīku i amatnīku produkceju. ✅ Portals lakuga.lv īsoka atbaļsteit vītejūs! #latgaliski#Latgola#LTGdraudzeigs#Ludza#veikals#SIF_NVOfonds
Kai Jānis Pampe, īsaceidams nūbraukt iz Ludzu, kaidreiz saceja: “Kod Ludzys azari apstaiguoti i puorbaudeits, ka piļsdrupys iz vītys, nūteikti var garšeigi sevi palutynuot picerejā “Astotais Rajons”. Pi jūs vysod gordi!” 🎲 “Astotais rajons” pīduovoj na tik gordys picys, tok ari latgaliskuos izklaidis – ite dažys nu tom! #SIF_NVOfonds#latgaliski#Ludza
Ebrejim ir bejuse nūzeimeiga lūma Rēzeknis piļsātys viesturiskajā atteisteibā. Vairuoku godu symtu laikā ebreji ar sovu kulturu, religeju i ekonomiskajom aktivitatem boguotynuoja i atteisteja Rēzeknis piļsātu, da Ūtruo pasauļa kara izveidojūt tū par vīnu nu sovys kūpīnys nūzeimeiguokajim centrim Latgolā. ℹ️Da myusu dīnu Rēzeknis piļsātvidē ir sasaglobuojušys na tik ebreju materialuos kulturys līceibys, nu ari cylvāki, kurī atguodoj ebreju tauteibys puorstuovus, tai īvāruojami papyldynojūt i boguotynojūt piļsātu ar namaterialū kulturviesturiskū montuojumu. 🧐Īpazeisti ebreju tradicejis i Zaļū sinagogu, vysvacuokū kūka āku Rēzeknē, kūpā ar gidu Voldemāru Ivdri trešdinēs i sastdinēs 11.00-15.00! #latgaliski#SIF_NVOfonds
This website uses cookies to improve your experience while you navigate through the website. Out of these cookies, the cookies that are categorized as necessary are stored on your browser as they are essential for the working of basic functionalities of the website. We also use third-party cookies that help us analyze and understand how you use this website. These cookies will be stored in your browser only with your consent. You also have the option to opt-out of these cookies. But opting out of some of these cookies may have an effect on your browsing experience.
Necessary cookies are absolutely essential for the website to function properly. This category only includes cookies that ensures basic functionalities and security features of the website. These cookies do not store any personal information.
Any cookies that may not be particularly necessary for the website to function and is used specifically to collect user personal data via analytics, ads, other embedded contents are termed as non-necessary cookies. It is mandatory to procure user consent prior to running these cookies on your website.
