Izsludynuota pīsasaceišona Storptautyskajai keramikys izstuodei “Martinsona balva 2023”
Rokstu sagataveja: portals lakuga.lv
Latvejis Laikmeteiguos keramikys centrs sadarbeibā ar Daugovpiļs Marka Rotko muokslys centru izsludynuojs pīsasaceišonu Storptautyskajai keramikys konkursa izstuodei “Martinsona balva 2023”, kas īsakļaun 4. Latvejis Keramikys bienalis programā, informej Rotko centra puorstuove Inita Paegle.
Latvejis Keramikys bienale ir vīns nu nūzeimeiguokūs laikmeteiguos keramikys nūtikšonu Baļtejis regionā. Bienali reikoj Latvejis Laikmeteiguos keramikys centrs sadarbeibā ar Daugovpiļs Marka Rotko muokslys centru. Bienalis pasuokumā pīsadola muokslinīki nu vysa pasauļa, kab atteisteitu i styprynuotu laikmeteiguos keramikys lūmu Latvejā i Baļtejā. Ituo gods bienalis tēma ir “Namīreigī iudini”.
Bienalis laikā teik organizāta “Martinsona balva” – storptautyskuo keramikys konkursa izstuode, kas nūteik Daugovpiļs Marka Rotko muokslys centrā i ir keramikys vitalitatis aplīcynuojums, kai ari veļtejums pasauļa slavi dabuojušajam Latvejis keramikam Pēterim Martinsonam. Individuali muokslinīki voi muokslinīku grupys teik aicynuotys pīsasaceit Storptautyskajai keramikys konkursa izstuodei “Martinsona balva 2023”. Dasacejuma īsniegšonys nūsacejumi i tīšsaistis pīsacejuma veidlopa daīmama ITE. Pīsasaceit var leidz 2023. gods 25. majam.
