Rokstu sagataveja: portals lakuga.lv

8. februarī 15.00 stuņdēs Latgolys Kulturviesturis muzejā atkluos Semjona Antonova gleznu izstuodi “Latgale – mana mīlestība”, kas veļteita muokslinīka 75 godu jubilejai, informej muzeja puorstuove Svetlana Dudarenoka.

Muokslinīks Semjons Antonovs ir dzims Rudzātūs, tok jau gondreiž 60 godu sevi sauc par riezeknīti. Absolviejs Rēzeknis Lītiškuos muokslys vydsškolu 1965. godā, piečuok vysu dorba myužu pavadejs, struodojūt Rēzeknis uzjāmumūs par muokslinīku-nūformātuoju, bet pyrma dūšonuos peļneitā atpyutā dorbuojīs teatra studejā “Joriks” kai saimnīceibys dalis vadeituojs i dekoraceju meistars.

Semjons Antonovs ir labi zynoms kai ainovu gleznuotuojs, kurymuos puorsvorā paruodeiti saulis gaismys i muokslinīka mīlesteibys īskauti Latgolys dobys skoti. Antonovs vys vēļ ir bejs maklātuojs i sūpluok īrostajam žanram sovā daiļradē pīsavierss ari abstrakcejai – kompozicejom, kas aizviņ puorsteidz juo muokslys cīneituojus i ļaun īpazeit pavysam cytu autora rodūšū škautni. Izstuodē apmaklātuoji varēs īpazeit jaunuokūs muokslinīka dorbus, kai ari īprīškejūs godūs padareitū.

Muzeja muokslys kolekcejā ir treis Antonova gleznys, kuruos tyka dabuotys kai piec tradicionalūs Latgolys muokslinīku rudiņa izstuožu 1999. i 2000. godā, tai piec juo personalizstuodis muzejā 2007. godā. Plaša muokslinīka gleznu izstuode “Krāsainā Latgale” Latgolys Kulturviesturis muzejā nūtyka 2012. gods februarī, bet 2017. godā – personalizstuode “Latgales krāsu burvība” Latgolys viestnīceibā GORS.

Izstuode “Latgale – mana mīlestība” Latgolys Kulturviesturis muzejā byus apsaverama leidz 4. martam.