Zynomi Latgalīšu kulturys goda bolvys “Boņuks 2022” nominanti
Rokstu sagataveja: portals lakuga.lv
Ir nūsasliedzs žurejis dorbs pi pretendentu pīsacejumu izviertiešonys, paziņojūt treisdesmit Latgalīšu kulturys goda bolvys “Boņuks 2022” nominantus, kab jau 4. martā 18.00 stuņdēs aizvadeitu kasgadejū bolvys padūšonys ceremoneju, gūdynojūt desmit aizvadeituo gods nūzeimeiguokuos nūtikšonys, aktivitatis i cylvākus latgaliskajā kulturā, kai ari padūtu bolvu par myuža īguļdejumu latgalīšu kulturys atteisteibā. Kai informej Latgolys viestnīceibys GORS puorstuove Santa Kļaviņa, itūgod bolvys padūšonys ceremoneja nūtiks kai ar skateituoju byušonu kluotyn Latgolys viestnīceibā GORS, tai tū varēs vērtīs tīšraidē LTV1 21.10.
Itūgod bolvys par aktivitatem, dorbu i sasnāgumim latgaliskajā kulturā tiks padūtys jau pīcpadsmytū reizi. Latgalīšu kulturys goda bolvys mierkis vys vēļ ir apkūpuot lobuokū, spylgtuokū i nūzeimeiguokū padareitū i nūtikšonys īprīškejā godā latgaliskajā kulturā, gūdynuot aktivuokūs latgalīšu kulturys puorstuovus, popularizātuojus, kai ari veicynuot i rūsynuot jaunradis i kulturys daudzveideibys atteisteibu iz prīšku. “Boņuks 2022“ gūdynuos par snāgumu i padareitū 2022. godā. Par pretendentu viertiešonys kriterejim ir izvierzeiti kai pretendenta snāguma kvalitate, aktivitate vysa gods laikā i regionā, vaļstī voi plašuokā mārogā raiseituo rezonanse, tai latgaliskums i/voi Latgolys kulturys vierteibu nesšona, kai ari pretendenta ilgtspieja – ītekme iz latgaliskuos kulturys procesim iz prīšku.
Latgalīšu kulturys goda bolvys “Boņuks 2022” nominanti ir (alfabeta parādā):
- Annelis Slišānis stuostu i dzejis kruojums “tuoraga stuosti. pīns”
- Antoninys Masiļūnis “Povuoru gruomota”
- Atjaunuotais nacionalūs partizanu bazneicys bunkurs Stompakūs
- Bīdreibys “LgSC” darbeiba 2022. godā
- Bīdreibys “Ludzas amatnieks” vuiceibu filmys par senejūs omotu prasmem i zynuošonom
- Daņču gruomateņa – albums “Latgolys daņči i na tik”
- Daugovpiļs teatra izruode “Spreideits”
- Daugovpiļs Vīneibys noma “Tradiceju sāta”
- Folklorys studejis “Banga” debejis albums “TALKA”
- Grupa “Bez PVN” ar dzīsmem i videoklipim nu tūpūšuo albuma “PARALELI HORIZONTI”
- Grupa “Muosys” ar debejis albumu “Ceļā”
- Grupa “Rupuči” ar bārnim i saimem paradzātu YouTube kanalu latgaliski
- Grupa “Tautumeitas” ar dzīsmem i videoklipim nu albuma “Skrejceļš”
- Ivetys Seimanovys dorbu izstuode “Lobs ar lobu sasatyka” vysā Latvejā
- Īstudiejums “Muols”
- Jauna kulturvīta Daugovpilī – keramika Pētera Martinsona sāta
- Juris Urtāns
- Laima Jurča
- Latgolys kongress
- Ligijis Purinašys dzejis kruojums “pierobežas”
- LRT žurnaliste Ausma Sprukte-Kozule
- Myusdīnyu latgalīšu literaturys raidīroksts “Puslopys”
- Myusdīnu latgalīšu tekstu korpuss “MuLa2022”
- Nautrānu pogosta karte latgaliski
- Pyrmais dzejis slams latgaliski “Rogovkys dzejis voga”
- Pyrmais latgalīšu serials “FATI”
- Valentina Lukaševiča eseju kruojums “Casnāgu maizeitis”
- Vinsenta Flikigera i Edeitis Husaris stuostu gruomateņa “Trusīni vessim reitā pi puiša”
- Vuiceibu kurss “Latgaliešu rakstu valoda” platformā “Tava klase”
- YouTube kanals “Im a’mazed”
Itūgod tyka īsnāgti 125 pretendentu pīsacejumi, kurus izviertēja žurejis komiseja, tuos sastuovā īkļaunūt īprīškejūs godu bolvu sajiemiejus, medeju puorstuovus, bolvys reikuotuoju puorstuovus, latgaliskuos kulturys sabīdryskūs aktivistus i attīceigūs sferu pīaicynuotūs ekspertus, kuru kasdīna nav saisteita ar latgaliskū kulturu. Ar pylnu žurejis komisejis sastuovu var īpasazeit ITE. Žureja īsnāgtūs pretendentus izviertēja divejuos kuortuos – pyrmuo ir nakluotīnis kuorta, kurā teik izvārtāti vysi īsnāgtī pretendenti, bet ūtrei ari itūgod ir attuolynuotuo kluotīnis kuorta, kurā žurejis lūcekli diskutej i izviertej jau 30 nominantus. Ar “Boņuka” muola statuetem teik gūdynuoti tī 10 pretendenti, kuri sajāmuši leluokū punktu skaitu kūpā obejuos kuortuos. Bolvys “Par myuža īguļdejumu latgalīšu kulturys atteisteibā” sajiemiejs tiks publiski paziņuots februara vydā.
Bolvys padūšonys ceremoneju vadeis akters Juoņs Kruonis (Kronis). Skateituojus kluotīnē i tīšraidē TV prīcynuos grupa “Bez PVN” i Valters Pūce, “Latgalīšu Reps”, “Tautumeitas” i Renārs Kaupers, bārnu grupa “Rupuči”, Ūga, folkloristi Ēriks Zeps i Julgī Stalte, kai ari Māra Briežkalna kvintets kūpā ar Birutu Uozuoliņu (Ozoliņu). Beletus iz “Boņuks 2022” ceremoneju var nūpierkt kai Latgolys viestnīceibys GORS, tai “Biļešu Paradīzes” beletu tierdznīceibys sistemuos škārsteiklā, kai ari kasēs kluotīnē. Latgalīšu kulturys goda bolvys “Boņuks” padūšonys ceremonejā tiks nūskaidruots ari publikys simpateju bolsuojuma bolvys – Žyka – sajiemiejs. Sovu simpateju variesi atbaļsteit Latvejis Sabīdryskuo medeja portalā LSM.lv, kurā bolsuošona nūtiks sadarbeibā ar latgalīšu kulturys ziņu portalu lakuga.lv. Bolsuojums suoksīs 20. februarī i byus da 1. marta.
Latgalīšu kulturys goda bolva “Boņuks” pyrmū reizi tyka padūta 2009. godā, bet nu 2013. gods bolvu reikoj Latgolys viestnīceibys GORS komanda, sasadorbojūt ar bīdreibu “Partitūra”. Bolvys “Boņuks 2022” nūtikšonu atbolsta Vaļsts kulturkapitala fonda Latgolys kulturys programa ar A/S “Latvijas valsts meži” i Latgolys regiona atteisteibys agenturys atbolstu, kai ari Rēzeknis piļsātys dūme, Centraluo finanšu i leigumu agentura, Bolvu nūvoda pošvaļdeiba, Kruoslovys nūvoda pošvaļdeiba, Leivuona nūvoda pošvaļdeiba, Preiļu nūvoda pošvaļdeiba i Rēzeknis nūvoda pošvaļdeiba.
