Rokstu sagataveja: portals lakuga.lv

Februara suokuos jaunu dzīsmi sovā profilā socialajā teiklā “Facebook” publiciejs dzīšmu autors i dzīduotuojs Jurs Ostrovskis. Tī jaunuo dzīsme i video “Balāde par latgalim un čangalim” eisā laikā dabuojuse cīši lelu “Facebook” auditorejis patikšonu – klipam ir jau vaira nakai 46 tyukstūšys skatejumu.

Kai portalam lakuga.lv stuosta pats dzīsmis autors Jurs Ostrovskis, jaunuo skaņdorba i video “Balāde par latgalim un čangalim” īdviesme bejuse kaida navīnnūzeimeiga aktualitate regionā, kū raisejuse napasenejuo administrativi teritorialuo reforma. Ostrovskis atzeimoj, ka dzīsmē gona humorpylnys pošironejis, tok gola morale asūt, ka vysim vys tik juodzeivoj mīrā.

Dzīsmis teksta i muzykys autors ir pats Jurs Ostrovskis, bet tuos aranžeju taisejs Kaspars Maks. Dzīsmis video verseju taisejs video operators Aleksandrs Hlestovs. Dzīduotuojs soka lelu paļdis atsauceigajim doncuotuojim, Augšdaugovys nūvoda kulturys centram “Vārpa”, kurā janvara vydā nūtyka klipa fiļmiešona, kai arī Daugovpiļs teatra akteru trio – Ritvaram Gailumam, Egilam Viļumovam i Mārim Korsietim.

Pārnejais gods Ostrovskam ari asūt bejs cīši darbeigs i veiksmeigs – ar vaira nakai 30 autorkoncertim, pīsadaleišonu raidejuma “Latvijas sirdsdziesma” goda finalā, koncertā “Taiseits Latgolā” Dzintaru koncertzālē Jiurmolā, kai ari aizsuoktu dorbu pi jauna albuma.

Taipat taišni piec mieneša, 8. martā, Jurs Ostrovskis aicynoj iz 8. marta eipašū koncertu Rēzeknē, Rēzeknis Nacionalūs bīdreibu kulturys nomā “Joriks”. Vīnā koncertā uzastuos kai pats Ostrovskis, tai dzīdūšuo Tihovsku saime, kai ari eipašuo gaška – televizejis raidejuma “Latvijas sirdsdziesma” 2022. gods finala uzvarātuoja Aija Legzdiņa. Bet pyrma koncerta Rēzeknē, 5. martā, gaidoma Jura Ostrovska i grupys “ARmaestro” uzastuošona Grenctalē, Bauskys pusē ar koncertprogramu “Latgalīša sirds”. Koncertprogramā skanēs labi zynomuos dzīsmis – “Daugaveņa”, “Hej, bruoļ latgalīt”, “Latgaleite”, “Dzymtuo puse”, “Viss tikai tev”, “Vacuoku sāta” i cytys.