Latvejis Literaturys goda bolvai pyrmajā kuortā izvierzeiti ari latgalīšu autoru dorbi

Latvejis Literaturys goda bolvai pyrmajā kuortā izvierzeiti ari latgalīšu autoru dorbi

Rokstu sagataveja: portals lakuga.lv

Gatavejūtīs Latvejis Literaturys goda bolvai (LALIGABA), kas itūgod nūtiks ar saukli “LALIGABA cirkulē”, ekspertu komiseja paziņuojuse autoru i dorbu garū sarokstu, kurā īkļauti ari diveju latgaliski rokstūšu autoru dorbi: Ligijis Purinašys dzejis kruojums “pierobežas” i Annelis Slišānis stuostu kruojums “tuoraga stuosti. pīns”, viestej publiski daīmamuo informaceja.

Jau ūtrū godu LALIGABA pretendentu izviertiešona nūteik div kuortuos – itūšaļt daīmams pyrmuos kuortys dorbu saroksts, bet apreļa suokuos tiks paziņuots nominantu saroksts. Ligijis Purinašys kruojums “pierobežas” īkļauts kategorejā “Labākais dzejas autordarbs”, sovpus Annelis Slišānis kruojums “tuoraga stuosti. pīns” – kategorejā “Labākais prozas autordarbs”. Ar pylnu izvierzeitūs dorbu sarokstu var īpasazeit ITE.

Ligijis Purinašys dzejis kruojums “pierobežas”, kurā pameišus apkūpuoti 2020.-2021. godā radeitī teksti latgalīšu rokstu i latvīšu literarajā volūdā ir mieginuojums tyvynuot obejis rokstu tradicejis, aicynojūt byut ījiuteiguokim i īkļaunūšuokim, kai ari pīgrīžūt viereibu pīrūbeža fenomenam. Dzejis kruojuma vizualuos koncepcejis autors ir Raivis Nikolajevs, kas pīduovoj dzili intimu redzīni iz vidis, tekstu i autoris mejīdarbeibu sovā storpā, ilguokā laika periodā sekojūt leidza dzejneicys īškejom i uorejom puormaiņom. Vizualais materials veiduots, sapludynojūt fotografejis i ilustracejis žanrus, kai ari izmontojūt autoris kermini kai muokslys dorba plakni, aktualizejūt tū, ka nu muokslys, leidzeigai kai nu tetoviejuma, navar vīglai i nasuopeigai atsabreivuot. Sarunu ar Ligiju Purinašu par kruojumu var puorskaiteit ITE, sovpus dzejneicys Ingys Pizānis recenzeju par tū – ITE.

Annelis Slišānis kruojums “tuoraga stuosti. pīns” ar četrpadsmit literarajim dorbim – stuostim i dzejūlim – ir par suokumu: par cylvāka suokumu, par sīvītis suokumu byut muotei, par itū laiku. “Pīdzimt i izaugt mīlesteibā, izaugt par lobu cylvāku bez vardarbeibas apleik i sevie. Suokums var byut vusuods. Ar pīnu i bez tuo, vardarbeigā sistemā īrauts i svareiguo breiža nasaprasts i najiuteigs. Bailies i tymsā. Tuods suokums ari var byut. Pīns ir kuo suokums ari tuoragam, i pīns caurvej vusus stuostus, I gruomata ir suokums nazkam cytam, jaunam otkon nu gola, jaunīm stuostīm,” kruojuma ideju atkluoj Annele. Portala lakuga.lv redaktoris Laurys Meļnis recenzeju par kruojumu var puorskaiteit ITE.

LALIGABA ekspertu komisejā itūgod dorbojās tulkuotuoja i dzejneica Ingmāra Baluode (Balode), kulturys žurnaliste Anda Buševica, dzejnīks i rakstnīks Andris Akmentiņš, tulkuotuojs Dens Dimiņš, rakstneica i publiciste Ilze Jansone, dzejneica i ilustratore Lote Vilma Vītiņa i literaturzynuotnīks Ojārs Lāms. LALIGABA apbolvuošonys ceremoneja nūtiks 28. aprelī atjaunuotajā Reigys Cyrka ākā. Pyrma tuo tradicionali nūtiks finala nominantu dzejis i prozys skaitejumi. 

Kalenders

Nov
22
Pīk
15:00 “80 gadi atmiņās, atziņās, atklā... @ Rēzeknis Centraluo biblioteka
“80 gadi atmiņās, atziņās, atklā... @ Rēzeknis Centraluo biblioteka
Nov 22 @ 15:00 – 17:00
Rēzeknis Centraluo biblioteka aicynoj sevkuru iz eipašū UNESCO Latvejis Nacionaluos komisejis teikla “Stāstu bibliotēkas” pasuokumu “80 gadi atmiņās, atziņās, atklāsmēs”, kas nūtiks 22. novembrī 15.00 stuņdēs.   Novembrī Rēzeknis Centraluo biblioteka svietej 80 godu jubileju.[...]
19:00 Izruode “Mazpiļsāta” @ Solyspiļs kulturys noms "Rīgava"
Izruode “Mazpiļsāta” @ Solyspiļs kulturys noms "Rīgava"
Nov 22 @ 19:00 – 21:00
“Pannas Teātris” skateituojim pīduovoj izruodi – slovonuokuos myusu dīnu Latgolys lugu autoris Danskovītis jaunuokū komedeju. Izruodis režisors Juris Rijnieks liks akterim Zanei Daudziņai, Aldim Siliņam, Elīnai Vānei, Jānim Skanim voi Jurim Lisneram runuot ari latgaliski[...]