Rokstu sagataveja: portals lakuga.lv

17. februarī Rēzeknis piļsātys Kulturys nomā nūtiks jau ūtrais pasuokums ar nūsaukumu “Ziepes” aba “Zīpis”. Itūreiz pasuokums byus veļteits mīleibys svātkim – Svātuo Valentina dīnai. Tymā ar sovim attīceibu pīredzis stuostim daleisīs četri latgalīši – puors Juoņs Pampe i Rasa Deksne, dramaturge Ludmila Ruoziņa (Roziņa), prīsters Guntars Skutels, sovpus par muzykalū pavadejumu pasaryupēs “Bigmaar’s Records” puorstuovs nu Upītis Māris Keišs, viestej pasuokuma iniciators i kūpradis vītys “Latgalactica” radeituojs Raimonds Platacis.

Naparostais nūsaukums “Latgalactica” ir rodūša platforma, kas vīnoj cylvākus, kuri dora lītys Latgolā. Kai roduos tik interesants nūsaukums? Tuo autors Raimonds Platacs, kurs ir ari reklamys specialists, doluos sovuos sajiutuos: “Mes asam taidi jaudeigi vīnsātnīki. Asu bejs pi daudzu latgalīšu – kotra tei sāta ir kai atseviška planeta. Mes te Latgolā kotrs riņkojam pa sovu orbitu koč kaidā ziņā. Bet ir taids lels Vysums, galaktika, pa kuru mes vysi riņkojam kūpā vīnā vierzīnī i uotrumā.” Vaira par “Latgalacticu” skaiti rokstā ITE.

Itūreiz “Zīpu” pasuokums byus veļteits mīleibys temai, kura laikā puors Rasa Deksne i Juoņs Pampe pastuosteis par sovu personeigū attīceibu pīredzi, par kūpeigom nūtikšonom, par veiksmem i naveiksmem. Ar sovu profesionalū i personeigū pīredzi pasadaleis dramaturge Ludmila Ruoziņa, sovpus prīsters Guntars Skutels pastuosteis par “zīpem” lauleibu ceremonejuos.

Vīna nu pasuokuma organizatoru Evija Piebalga stuosta, ka itūreiz pasuokumā byus drupeit vaira “cukra”, tok kūpumā byus tai, kai ir dzeivē.

“Tei jau ir golvonuo pasuokuma ideja – nasabeit runuot par sovom naveiksmem, spēt pasasmīt par tom i nūjaukt rūbežus, kurūs mums redzīs, ka sovuos problemuos asam vīni poši,” sovuos puordūmuos doluos Evija.

Par pasuokuma muzykalū pavadejumu pasaryupēs “Bigmaar’s Records” puorstuovs nu Upītis Māris Keišs, byus vareiba īsaguoduot “Latgalactica” puoru zīpis nu jaunuos kolekcejis, kai ari KUUP grauzdātuvis dzierīņus i konditorejis izstruoduojumus.

Beletus iz pasuokumu var nūpierkt tīšsaistē ITE.