Rokstu sagataveja: portals lakuga.lv

Roberta Mūka muzejs Gaļānūs aicynoj školys pīsadaleit Robertam Mūkam veļteitajā jaunradis rodūšūs dorbu konkursā školānim, informej muzeja puorstuovi. Ituo gods konkursa tema ir “Laika joņos”, tok školāni teik aicynuoti īsyuteit ari latgaliski pīraksteitus dorbus.

Robertam Mūkam itūgod palīk 100 godu. Jam veļteitais muzejs Gaļānūs aicynoj školys īsaisteit bārnus i jaunīšus vacumā nu 7 leidz 19 godim, īpazeit Roberta Mūka dzeju i esejis, mudynuot kasdīnā saredzēt naparostū i sovpateigū, vāruot, analizēt, izpieteit i izsaceit puordūmys par tendencem myusu dīnu sabīdreibā, radeit jaunradis rodūšūs rokstu dorbus, īkļaunūt tymūs školānu dūmu, izjiutu i puordzeivuojumu atkluosmis.

Dalinīku aizdavums: atbylstūši temai pīraksteit sevkura žanra jaunradis dorbu, izavielejūt sovu viersrokstu. Dorbam juobyut na garuokam par div A4 puslopom datorrokstā.

Dorbi juoīsnādz leidz 2023. gods 25. septembram, syutūt iz e-postu muks.konkurss@preili.lv.

Konkursa viertiešonys kritereji ir atbiļsteiba temai i nūlykuma nūsacejumim, izpiļdejuma originalitate, tehniskais izpiļdejums – dorba nūformiešona. Školānus viertēs pīcuos grupuos: 1.-3. klase; 4.-5. klase; 6.-7. klase; 8.-9. klase; 10.-12. klase.

Ar konkursa nūlykumu var īpasazeit ITE.