Rokstu sagataveja: portals lakuga.lv

2.–3. aprelī Rēzeknis Tehnologeju akademejā (RTA) nūtiks storptautysks seminars, kurā pietnīki i školuotuoji diskutēs par jaunys apvuiceibu e-platformys izveidi, informej RTA puorstuove Lolita Kivleniece-Kuznecova. RTA sadarbeibā ar Frizu Akademeju (Nīderlande, vodūšais partners), Storpdisciplinarū pietnīceibys centru (Portugale), Nord Universitati (Norvegeja) i Tallinys Universitati (Igauneja) dorbojās Erasmus+ projektā “Tīseibys iz pīdereibu i lidereiba: celi (apdraudātūs) volūdu lītuojumam školuos”.

Seminara laikā byus vareiba diskutēt par latgalīšu kinys i muzykys atteisteibu, jūs nūzeimi jaunuos paaudzis motiviešonā vuiceitīs latgalīšu volūdu ci nūvodvuiceibu. Muziks i viesturnīks Arņs Slobožaņins i muziks Sovvaļnīks stuosteis par sovu pīredzi i nūvāruojumim.

3. aprelī byus praktiskuos nūdarbeibys par latgalīšu volūdys korpusu (tekstu i runys) lītuojumu gramatikys vuiceibuos, kai ari idejis stuņžu modeļam, izmontojūt cytus digitalūs reikus i platformys latgaliski. Taipoš vysim, kas pīsasaceis, tiks izsyuteita e-apvuiceibys platformys daļa “Volūdys profils”, kū seminarā testēs, diskutēs par tū, kai e-apvuiceibu platformu veiduot tuoļuok.

Projekta OWL+ sasnādzamī rezultati ir:

• E-apvuiceibys platforma, kas atbylstu aktualajim vierzīnim volūdu izgleiteibā i kas byutu draudzeiga lītuotuojam, vīgli izmontojama latgalīšu, frizu, dīnvydsamu, mirandīšu i cytu regionalūs volūdu apgiviejim.
• Tīšsaistis vuiceibu moduļs, kab padzilinuotu školuotuoja izpratni par kūpīnys vajadzeibom, volūdys vuiceišonys īspiejom i multilingvismu školā.
• Digitala pavuiceiba i digitalūs reiku kūpums školuotuojim, kab atvīgluotu sovys vuiceibu programys izveidi i materialu daudzveideibu volūdu vuiceibom, kur materialu kluosts ir īrūbežuots.

Seminaram aicynuoti pīsasaceit školuotuoji, studenti, nūvodpietnīceibys praktiki, volūdu pietnīki. Seminara nūslāgumā byus aplīceiba (16 h). Pīsasasaceit da 1. marta var ITE.

Pasuokuma programa ITE.