Daugovpilī byus ekspertu diskuseja par pretruneigai vārtātim Latvejis 20. g. s. viesturis vaicuojumim
Rokstu sagataveja: portals lakuga.lv
1. martā 15.00 stuņdēs Daugovpiļs Vīneibys nomā tiks reikuota ekspertu diskuseja “Atceres telpa Latgalē: konflikti un risinājumi”, viestej publiski daīmamuo informaceja. Diskusejis mierkis ir veicynuot dialogu storp dažaidom atmiņu kulturom i sekmēt izpratni par nareši jiuteigim i pretruneigai viertātim Latvejis 20. godu symta viesturis vaicuojumim.
Atguoduošonys telpa Latvejā ir veiduojusēs navīnmiereigai. Nu Latvejis naatkareibys atjaunuošonys tei ir pakuopeniskai atsabreivuojuse nu padūmu okupacejis laikā radeituo pīminis kultursluoņa. Tikom paraleli godu gaitā Latvejā ir izaveiduojs cyts – naoficials i nareši opozicionars – atguoduošonys kulturys segments. Eipaši uzskotami tys radzams Latgolā, kur lokaluo viesture veidoj pamatu konkurejūšim nasenejuos paguotnis viertiejumim. Cik lelā mārā i parkū viesturiskuo atmiņa Latgolā atsaškir nu cytu Latvejis vītu? Kaidi ir golvonī prīšknūsacejumi, kab veiduotūs vīnojūša izpratne par Latvejis 20. godu symta viesturi? Par itim i cytim vaicuojumim diskutēs Daugovpiļs Krīvu kulturys centra vadeituoja Nataļja Kožanova, Latvejis Universitatis Latvejis viesturis instituta pietnīks Uldis Neiburgs, Daugovpiļs Universitatis profesore Irēna Saleniece, Daugovpiļs Universitatis asociātais profesors Henrihs Soms, Latvejis Universitatis Filozofejis i sociologejis instituta vodūšais pietnīks Kaspars Zellis i Daugovpiļs Tehnologeju vydsškolys-liceja viesturis školuotuoja Larisa Želve. Diskuseju vadeis Latvejis Universitatis Filozofejis i sociologejis instituta vodūšais pietnīks Mārtiņš Kaprāns.
Dūmu apmaiņā aicynuoti pīsadaleit humanitarūs i socialūs zynuotņu, navaļstiskūs organizaceju, masu medeju i cytu sferu puorstuovi, kas īsaisteiti viesturis izpietē i komunikacejā. Pasuokumu finansiali atbolsta Kulturys ministreja. Par saturu ir atbiļdeiga Latvejis Okupacejis muzeja bīdreiba.
