Rokstu sagataveja: portals lakuga.lv

Turpynojūt latvīšu tautys muzykys i legendaru Latvejis komponistu padareituo apspieliešonu džeza muzykys žanrā, izdūts Latgolys regionam veļteits Māra Briežkalna kvinteta albums “Latgalian Evergreens”. Kai viestej kvinteta puorstuovi, publiski albums tiks prezentāts sastdiņ, 4. martā, ar uzastuošonu Latgalīšu kulturys goda bolvys “Boņuks” ceremonejā Latgolys viestnīceibā GORS.

2005. godā tyka izdūts Māra Briežkalna kvinteta albums “Latvian Evergreens”, bet vēļ 1997. godā Myusu dīnu muzykys centrys izdeve ari disku “Kur tu teci”, pīsadolūt trompetistam Gunāram Rozenbergam i saksofinistam Raimondam Raubiško. Niu izdūtais albums “Latgalian Evergreens” ir kai logiskys turpynuojums īprīškejim albumim, pīduovojūt kvalitativa džeza meiļuotuojim nu jauna i cytaiduokā skaniejumā izbaudeit taidys Latgolys muzykaluo montuojuma pērlis kai “Auga, auga rūžeņa”, “Kūkleitis skanēja”, “Aiz azara malni meži” i cytys. Treju albuma kompoziceju – “Rudiņs bolss”, “Še lozdu kryumeni salopuoja” i  “Aiz upītes es izaugu” – īrokstā pīsadalejuse ari labi zynomuo tautys muzykys muokslineica, dzīduotuoja i kūklātuoja Biruta Uozuoliņa (Ozoliņa).

“Projekts “Latgalian Evergreens” ir kai emocionals i informativs adapters, kas paleidz platuokai publikai atkluot skaistys i vēļ nazynomys latvīšu muzykys nūskanis,” soka Biruta. “Asu puorlīcynuota, ka “Latgalian Evergreens” izsmolcynuotais skaniejums spies īprīcynuot kotru klauseituoju.”

Albuma īroksts taiseits Latvejis Radejis 1. studejā. “Latgalian Evergreens” radeišonā pīsadalejs saksofonists Kristaps Lubovs, pianists Viktors Ritovs, mutis garmanis i tausteņinstrumentu spālātuojs Raimonds Macats i basists Pēteris Liepiņš.

“Maņ itys īroksts ruodīš cīši daudzveideigs, gaumeigs, profesionali padareits i, kas itūreiz eipaši svareigi, ari latgaliski dvielesiskys!” izsver Latgolys viestnīceibys GORS muokslinīcyskuos i pasuokumu nūdalis vadeituoja Ilona Rupaine.

Albuma “Latgalian Evergreens” īspieļuojušuo kvinteta vadeituojs, bundzinīks i producents Māris Briežkalns īspieļuojs sytaminstrumentus vaira nakai 60 muzykys albumu īrokstā. Jis uzastuojs i pasnēdzs meistarklasis daudzuos vaļstīs, tūs vydā Lelbritanejā, Fraņcejā i Vuocejā. Briežkalns voda Myusu dīnu muzykys centru i ir storptautyskuo improvizacejis, džeza i pasauļa muzykys festivala “Rīgas Ritmi”, kai ari storptautyskuo džeza muokslinīku konkursa “Riga Jazz Stage” muokslinīcyskais direktors. Jis ir Latvejis Radejis Skaņu īrokstu dalis vadeituojs i garus godus beja ari Latvejis Radejis bigbenda muokslinīcyskais vadeituojs.

“Kab ari cik tys naizaklauseituo puorsteidzūši, ideja par Latgolys nūskaņu albumu džeza žanrā roduos Teksasā,” soka Māris. “Koncertiejom ASV i gastejom pi Latvejis gūda konsula Pītera Ragauša, kuram eipaši īpasatyka myusu diskys “Latvian Evergreens”. Jemūt vārā sovys latgaliskuos saknis, jis īrūsynuoja, ka leidzeigu programu varātu radeit, ari izmontojūt Latgolys muzykalū montuojumu. Niu itei ideja ir puordzymuse programā “Latgalian Evergreens”!”

Jaunuo albuma nūformiejumā izmontuots muokslineicys Kristīnis Kutepovys radeitais dorbs. “Latgalian Evergreens” var nūsaklauseit muzykys straumiešonys vītnēs, taipat tys byus daīmams ari kompaktdiska i vinila platis formatā. Albuma izdeviejs – “MMC Ieraksti”.