Rokstu sagataveja: portals lakuga.lv

Jau pīktū reizi Latgalīšu kulturys goda bolvā “Boņuks” tyka nūskaidruots ari publikys simpateju bolvys “Žyks” sajiemiejs. Bolsuošonu organizej latgalīšu kulturys ziņu portals lakuga.lv, sasadorbojūt ar portalu LSM.lv. Leluokū bolsuotuoju atbolstu sajēme školuotuoja, rūkdarbneica i “Latgolys etnografiskuos viestnīceibys” vadeituoja Iveta Seimanova.

Iveta Seimanova i izstuode “Lobs ar lobu sasatyka” beja vīns nu 30 ituo gods Latgalīšu kulturys goda bolvys “Boņuks” nominantu. Pyrmū reizi izstuode ar Latgolys dažaidu vītu tautystārpūs apviļktom tautumeitom beja apsaverama 2022. gods Latgolys kongresa laikā Rēzeknē, Latgolys viestnīceibā GORS, bet piečuok izstuode “Lobs ar lobu sasatyka” bejuse apsaverama i apbraukuojuse na tik dažaidys Latvejis vītys, nu ari pabejuse uorzemēs. Vaira par izstuodi “Lobs ar lobu sasatyka” ITE.

Publikys simpateju bolvu “Žyks” Iveta Seimanova sajēme jau trešū reizi – vysu leluokū publikys atbolstu jei dabuojuse ari pyrmajuos divejuos bolvys padūšonys reizēs. Kai ceremonejā nūsasmieja poša Iveta – iz Reigu dūdūt tik Žykus viņ, tok niu jai čemodans pylns ar vasalim treis Žykim.

“Asu nu tautys i muns dorbs ir atdūt tautai gūdu ar godu symtūs saglobuotajom tradicejom i vierteibom. Navaru pasceit paļdis kotram par tū atbolstu i mīlesteibu, kū sajiemu kai nu Latgolys i Latvejis, tai cytom vaļstim, i turpynoju sajimt, deļtuo lels paļdis vysim – turpynuošu dareit tū, kū i dareju da ituo. Pi 26 lelūs tautumeitu čemodanu niu varēs dalikt ari mozū ar vysim trejim Žykim, kas tautumeitys sorguos!” tai par bolvys sajimšonu soka Iveta.

“Žyka” bolvys statueti pyrmūs treis godus taiseja keramike Kristīne Nīcmane nu darbneicys “Jašas podi”, tok pārn i itūgod bolvys autore ir ari “Boņuka” statuešu veiduotuoja Vēsma Ušpele nu pūdnīku darbneicys “Malny Wylky”.

Latgalīšu kulturys goda bolvys “Boņuks 2022” ceremoneju vēļreiz var nūsavērt ITE.