Rokstu sagataveja: portals lakuga.lv

Latgalīšu kulturys kusteiba “Volūda” aicynoj jaunīšus (16–21 godu vacumā) īsasaisteit izaugsmis i Latgolys izzynuošonys programā “LTG tu dū!”. Programys mierkis ar nūdarbeibom, braucīnim, aktivu i zynūšu cylvāku satikšonu ir motivēt jaunīšus vaira izzynuot i pošim īsasaisteit latgalīšu kulturvidis i sabīdryskajuos nūrisēs, byut par jaunajim Latgolys liderim, portalu informej kusteibys puorstuovi. Dasasaceišona, aizpyldūt dasacejuma anketu ite ej.uz/LTGtudu, da 26. marta.

Jaunīšu izaugsmis i Latgolys izzynuošonys programā “LTG tu dū!” itūgod paradzātys devenis nūdarbeibys (kluotīnē i tīšsaistē), kuruos sarunu, aizdavumu, ekskurseju, diskuseju i praktiskūs dorbu veidā jaunīšim byus vareiba izzynuot latgalīšu kulturvidis i sabīdryskūs procesus, īpasazeit ar aktivim Latgolys cylvākim, gasteit dareituoju uzjāmumūs, īsavuiceit latgalīšu rokstu volūdys pamatus, atteisteit sovys tūpūšū lideru prasmis, kai ari jau praktiski pošim īsasaisteit latgalisku projektu eistynuošonā. Paradzāts, ka programys lektoru vydā byus zeimyna “Latgalactica” atteisteituojs, reklamys specialists Raimonds Platacis, “Europe Direct Dienvidlatgale” koordinators Oskars Zugickis, “Ausmeņa Kebabs” saiminīks Valters Murāns, tekstilmuokslineica Annele Slišāne, radejis personeiba i influencers Lauris Zalāns i cyti.

Latgalīšu kulturys kusteibys “Volūda” vadeituoja Edeite Husare, aicynojūt jaunīšus īsasaisteit jaunajā programā, soka: “Vīna nu pārnejuo gods “Volūdys” spylgtuokūs nūtikšonu beja latgaliskais jaunīšu seminars “Atzolys”, kura laikā saprotom, cik aktivi, rūseigi i motivāti ir jaunīši īsasaisteit ari latgaliskuos kulturvidis procesūs. Ari piec seminara nūslāguma itī jaunīši turpynuoja byut atsauceigi i īinteresāti dažaiduos bīdreibys aktivitatēs. Pi tuo pādejūs godūs arviņ vaira teik runuots par tū, ka latgalīšu sabīdryskajūs procesūs datryukst jaunu ļaužu īsaistis, deļtuo ari itū programu jaunīšus gribim motivēt, styprynuot i aicynuot vaira īsasaisteit latgaliskajā jau niu. Apsazynojam i saprūtam, ka jau latvīšu volūdai myusu dīnuos ir gryuši konkurēt ar cytom daudzi izplateituokom volūdom, par latgalīšu volūdu nimoz i narunojūt. Jaunīši arviņ vaira sovā vydā runoj angliski, vuicuos korejīšu volūdu, “dzeivoj” cytu volūdu telpuos, deļtuo ar itū simboliskū volūdu spēli “LTG tu dū!” gribīs jaunīšu dīnys plānā dalikt koč nalelu vītu, dorbu, koč vīnu dūmu latgalīšu volūdā. “Šudiņ drupeit juopadora ari latgaliskais!” – tei ir motivaceja, kū gribīs radeit.”

Pīsadaleit jaunīšu izaugsmis i Latgolys izzynuošonys programā “LTG tu dū!” aicynuoti jaunīši nu 16 da 21 goda vacuma, pīsadaleišona ir bezmoksys. Izmoksys, kas jaunīšim varātu rostīs i juosadz pošim – ceļa izdavumi iz aktivitašu nūtikšonys vītom (Latgolā i Reigā) kluotīnis nūdarbeibu reizēs. Vītu skaits programā ir īrūbežuots i golvonais kriterejs daleibnīku atlasei byus kotra pretendenta motivaceja i variešona pīsadaleit vysuos programys aktivitatēs. Dasacejuma anketu da 26. marta var aizpiļdeit ej.uz/LTGtudu, bet programys atkluošonys pasuokums paradzāts 8. aprelī Rēzeknē.

Programa ir vīna nu latgalīšu kulturys kusteibys “Volūda” (bīdreibys “LgSC”) projekta “Latgaliskuos kulturvidis styprynuošona: sadarbeiba, izpratne i īsaiste” aktivitašu, kuru 2023. i 2024. godā atbolsta Sabīdreibys integracejis fonds nu Kulturys ministrejis daškiertūs Latvejis vaļsts budžeta leidzekļu.