Rokstu sagataveja: portals lakuga.lv

Portala lakuga.lv redakceja vysod cīši prīcojās, ka cylvāki skaita myusu rokstus i ar tim doluos. Stabuļnīku bibliotekys bibliotekaris ir aktivys portala lakuga.lv skaiteituojis, partū ituos nedelis īsacejumus vaicojam jom – Birutai Čaunānei i Anitai Betlerei.

Jezupa dīnys ļustis

19. martā teik svieteita Jezupa dīna. Tei ir vīneiguo dīna gavienī, kod var ēst, dzert i ļustēt. Vaira par Jezupa dīnu izzynoj ITE. Vuords Jāzeps (ltg. Jezups) Stabuļnīku pogostā sasagloboj cauri paaudzem, partū mes īsokom atzeimuot Jezupa dīnys tradicejis. Vīns veids, kai tū vari dareit – nūbraukt iz Aglyunu, iz Jezupa dīnys ļustem, kur variesi nūpierkt voi puordūt amatnīku voi muojražuotuoju produkceju.

Myusu mentalitatei tyvī “tuoraga stuosti”

Īsokom izlaseit obejis Annelis Slišānis “tuoraga stuostu” gruomotys. Stuosti ir tyvi myusu mentalitatei, tī nadatryukst i humora, car kurū smeļdze i apraksteituos problemys vaira nasalīk tik nūmuocūšys.

Laika plānuošona ar pīvīnuotū vierteibu

13. martā Stabuļnīku bibliotekā beja sasatikšona ar “Giut breidi” rodūšuos komandys puorstuovi i myusu pogosta dzeivuotuoju Amandu Anusāni. Myusu aicynuojums byutu plānuot laiku ar pīvīnuotū vierteibu i myusu pošu cylvākim plānuotuojā “Giut breidi”. Itūmienes plānuotuoja puslopuos var skaiteit dzejneicys Inetys Atpilis-Juganis puordūmys.