Rokstu sagataveja: portals lakuga.lv

19. martā 16 stuņdēs Maltys Kulturys nomā vysi interesenti teik gaideiti iz trešū “Plōciņu Mases pestivalu”. Plānuots, ka festivalā pīsadaleis vysaiduoki runuotuoji, stuosteituoji i muzykanti, kuri runuos kai sovys “peršys”, tai i koč kū nu Plōciņu Masis repertuara.

Plōciņu Mase ir gondreiž voi legendars tāls, kuru izveiduojuse Rēzeknis piļsātys gazetys “Rēzeknes Vēstis” ilggadeja žurnaliste i Rēzeknis Tautys teatra aktrise Anita Graudiņa. Plōciņu Masis humoristiskuos viestulis jau godim var skaiteit vītejā Rēzeknis gazetā. Da šam Plōciņu Mase ir izdavuse treis gruomotys: “Plōciņu Mase roksta” (1994-2003), “Plōciņu Mase roksta iz Kaliporneju” (2003-2008) i “Plōciņu Mase roksta” (2021), kurā trejūs symtūs puslopu apkūpuotys vysys vaira nikai 25 godu garumā iz Kaliporneju syuteituos viestulis.

Da šam Maltys Kulturys nomā ir nūtykuši diveji “Plōciņu Mases pestivali”, pyrmais pyrma 13 godu, ūtrais 2022. godā, niu byus trešais. Kai stuosta Maltys Kulturys noma vadeituoja Elīna Prusaka, itūgod Maltā paradzāts apjūmeigs pasuokums ar gostim nu vysaiduoku Rēzeknis nūvoda vītu, kuri stuosteis sovus stuostus, kas rodušīs, īsadvasmojūt nu Plōciņu Masis dorbu, kura 17. martā svieteis sovu 80 godu jubileju. “Pasuokumā pīsadaleis ari poša Plōciņu Mase, byus juos simpateju bolva i, prūtams, gūdynuosim i sveiksim ari pošu Anitu,” tai Maltys Kulturys noma vadeituoja Elīna Prusaka. Jei ari dasoka, ka kotrs stuostnīks iz festivalu īs ar sovom “peršom” aba sovim sacerātim stuostim, paņtenim i tt.

Sovpus poša Plōciņu Mase aba Anita Graudiņa stuosta: “Plōciņu Mase paleidz maņ dzeivuot. Jau gondreiž 30 godu. I niule, vacumā, ļaun steberēt pa dzeivi i “myužeiguo skaistuma” dzierksteņu īraudzeit i pasmaideit, kod svešūs ļaudīs pieški dzierdi kaidu sokam “Myužeigs skaistums!”” Jei ari dasoka, ka lelu prīcu roda tys, ka ka kotrā mīstā ir sova Mase i, ka tuos Masis turpynuoj stuosteit par sovu pīdzeivuotū plašuokam cylvāku lūkam.

Maltys Kulturys noma festivalā itūgod pīsadaleis Nagļu Masis i Nagļu Tautys noma vokalais ansamblis “Ilūzija” (vadeituojs Juoņs Trūps), Ūzulainis Mase Ināra Blinova, Ūzulainis Tautys noma folklorys kūpa “Zeiļa” (vadeituoja Ināra Blinova), stuostneica Vuoceļnīku Geļa nu Rēzeknis, Ženija Čudare, Rēzeknis pensionaru dīnys centra senioru ansamblis “Zelta rudens” (vadeituojs Rolands Ankipāns), Maltys Kulturys noma senioru vokalais ansamblis “Liepas” (vadeituojs Normunds Šekels), Maltys Apaļu Mase (Valentīna Miklaševiča), Maltys stuostnīks Arnolds Danovskis, Maltys Mase Elīna Prusaka. Pasuokumā tiks daškierta Plōciņu Masis simpateju bolva i gūdynuota poša gaviļneica.