Vīnkuoršs latgalīts vīnā ceremonejā ar Džimu Keriju i cytom zvaigznem
Rokstu sagataveja: portals lakuga.lv
Pyrma kaida laika, 9. martā, bārnu izklaidis zeimyns “Nickelodeon” apbolvuoja kasgadejūs “Kids’ Choice Awards 2023” bolvys sajiemiejus dažaiduos nominacejuos. Par nominacejis “Latvejis meiluokais influencers” uzvarātuoju tyka Lauris Zalāns. Lauris pats sevi sauc par vīnkuoršu latgalīti i soka: “Tys ir muns zeimūgs aba ordiņs, kurū es nosuošu vysod.” Tai dzeivē nūteik, ka vīnkuoršs latgalīts (voi ari vys tik na tik vīnkuoršs) var tikt nomināts vīnā ceremonejā storp pasauļa leimiņa zvaigznem. Vaicojam Laurim, kai jis jiutās Latvejis meiluokuo influencera statusā.
“Sajiutys ir augstuokajā leiminī, kab nasceitu vaira. Kū es ar tū vysu grybu pasceit? Pyrmom kuortom, cīši čudna sajiuta byut storp sovim elkim kaidā nu bolsuojuma kategoreju, jo tī ari pasaruodeja muns vysleluokais profesionaluos sferys motivators – Džims Kerijs. Atsarast ar jū vīnā lelā nūtykumā, kur principā jius asat nomināti vīnai i tai pošai bolvai – ir koč kas. Tys ir breineigs i skaists nūtykums, kur tu saprūti, ka ari mums ir vareiba pasaruodeit taidā plašuokā redzislūkā,” tai Lauris par sajiutom, sajemūt bolvu.
Lauris izsoka pateiceibu vysim atbaļsteituojim: “Es asu cīši prīceigs i pateiceigs vysim, kuri bolsuoja i dalyka sovu rūku. Koč drupeit atbaļsteja voi nūdūmuoja lobu dūmu, kab Laurim vyss saītu. Vysleluokais paļdis tyvajim, kas kasdīnā ar mani ir kūpā itymā lelajā pīdzeivuojumā.”
“Asu pyrmais latgalīts, kurs tī ir tics. Cīši forši, ka es tū latgaliskū naasu gribiejs izskaust dzeivis laikā. Tys ir muns zeimūgs aba ordiņs, kurū es nosuošu vysod. Es tū apsazynoju ar kotru dīnu vys vaira i itys ir vīns lels pīruodejums tam, ka latgalīšam byut ir baigi kruta. Viņ vaira jau deļtuo, ka kaids latgalīts redz, ka latgalīšam koč kur nazkas saīt voi jis nazkū dora, jis vēļ vaira suoc lapnuotīs ar tū, ka jis ir latgalīts. I maņ ir taišni taipat. I tys struodoj ari ūtraižuok. Ka cylvāki nu Latgolys dūd motivaceju struoduot i dareit tuoļuok, saprūti, cik vys tik labi ir byut latgalīšam,” tai Lauris par latgaliskū sevī.
Laurim par bolvys sajimšonu beja cereiba: “Es nasceišu, ka es naticieju, prūtams, bet es vysod atstuoju varbyuteibu, ka itūreiz nasaīs. Bet vēļreiz soku paļdis vysim, kuri atbaļsteja, saguojs ir tikai pasasokūt atbaļsteituoju dalyktajim pierstim! Es asu pateiceigs! Bolva ir nūzeimeiga deļ mane i tys apstyprynoj tū, ka asu iz pareizuo ceļa.”
Lauris ir na tik skotivis i socialūs teiklu personeiba, tok ari radejis personeiba. Trešdīnēs “RadioTev” eterā nu 14.00 leidz 17.00 sevkurs var vuiceitīs latgalīšu volūdu kūpā ar Lauri Zalānu. Kai tys nūteik? Lauris klauseituojim pīduovoj latgaliski pīraksteitu teikumu, īkļaunūt specifiskus latgalīšu volūdys vuordus, kurū Google translate reiks nūlosa. Tod cylvāki rauga saprast, kas tī ir dūmuots i tulkoj tū teikumu latviski. “Cylvāku atsauceiba ir astronomiski lela, jauki redzēt, ka vuiceitīs volūdu gryb raudzeit ari cylvāki, kurim ar Latgolu nav nikaida sakara. Tymā breidī, kod ir kaidi vīgļuoki teikumi, tod atsauceiba ir vēļ leluoka. Interesnai pasavērt i pasaklauseit, kai jī tulkoj vysu, kū es jim dūdu,” tai Lauris par latgalīšu volūdu “Radio TEV” frekvencēs.
