Rokstu sagataveja: portals lakuga.lv

Latgolys Kulturys centra izdevnīceiba izdavuse Romona Spaitāna gruomotu “Spaitojam”, kurā var puorskaiteit ap 100 autora dzejūļu latgaliski.

Dzejnīks Romons Spaitāns – eistajā vuordā Romualds Zarembo – dzims 1925. goda 28. septembrī Rēzeknis apriņka Drycānu pogosta Rūtalēs tureiga zeminīka saimē. Kai pats roksta, dzeive Makašānu, Nautrānu, Strūžānu i Drycānu pogostu sadurē, kur varēja dzierdēt vysaiduokys runys tradicejis, mūdynuojušys jimā interesi par volūdnīceibu. Piec vītejuos pamatškolys beigšonys (1938) vuicejīs Rēzeknis humanitarejā gimnazejā (1943), breivlaikā vuocs folkloru, pīrakstejs melodejis, ari muzykys školā vuicejīs spielēt vejūli. Gimnazejā siediejs vīnā sūlā Juoni Pujātu, kurs labi zynoms kai muokslys zynuotnīks i Latgolys keramikys “krysttāvs”. Jaunajā kruojumā atrūdams ari jam, kurs vītejā apleicīnē saukts par Trideišu Juoni, veļteits dzejūļs.

Atsagrīzs nu kara gaitom, Spaitāns īsasastuoja Latvejis Vaļsts universitatis Filologejis fakultatis latiņu volūdys nūdaļā, paraleli vuicejuos ari A. Jurjāna muzykys školā. Universitati pabeidze ar viesturnīka diplomu (1966) i myuža leluokū daļu struoduoja Ūgris rajona Lēdmanis pamatškolā par viesturis školuotuoju i školys direktoru. Beja rūseigs sabīdryskajā dorbā, vadejs kori i ansambļus. Niu dzeivoj Jaunmāšēnūs, Lēdmanis pogostā. Par ilggadeju pedagoga i sabīdryskū darbeibu apbolvuots ar Treju Zvaigžņu ordiņa Sudobra gūda zeimi.

Leidza ar atmūdu pasaruodeja dzejnīka publikacejis latgalīšu presē. Leidz itam izguojuši treis Romona Spaitāna dzejūļu kruojumi: “Trešī gaiļi” (1999), “Rudiņa orums” (2006) i “Atceļnīks” (2013).

Romona Spaitāna dzejai pīmeit gaišs sirds syltums, seviški rokstūt dzymtajā volūdā i par dzymtū Latgolu. Bet juo dzejā jaušama ari dziļa suope par myusu dīnu dzeivis nabyušonom i nataisneibom – i tod te ir kai drastisks humors, tai osa satira. Kruojuma “Spaitojam” piecvuordā Jūlijs Truops izceļ Spaitāna boguotū latgalīšu volūdu, kam nūteikti juopīkreit. “Apaceņ”, “stymbyns”, “laičine”, “paļts”, “skreipsts” ir tik daži nu myusu dīnuos pavysam reši lītuotu vuordu, kū varim puorskaiteit Romona Spaitāna dzejūļūs.