Rokstu sagataveja: portals lakuga.lv

2. majā, Latgolys viestnīceibys “Gors” Mozajā zālē nūtiks Juoņa Ivanova Rēzeknis Muzykys vydsškolys reikuotais Storptautyskais etnodžeza muzykys ansambļu konkurss “Guoyu pa JAZZ”, informej tuo organizatori. Konkursā pīsadaleis deveni muzykys ansambli nu septeņu Latvejis i Leitovys muzykys izgleiteibys īstuožu, kūpā puļcejūt vaira par 60 muziku.

Konkursa golvonais mierkis ir sova regiona tradicionalūs vierteibu izceļšona i tautys muzykys elementu īkļaušona myusu dīnu muzykys žanrā. Organizatori ar itū konkursu gryb sekmēt jaunūs muziku profesionalū izaugsmi, personys vyspuseigu atteisteibu, pylnveiduot muzykys izgleiteibys īstuožu audziekņu kolektivuos uzastuošonys prasmi i pīredzi, atteisteit instrumentalūs i vokali instrumentalūs ansambļu muziciešonys tradicejis i kvalitati myusu dīnu ritma i tradicionaluos muzykys stylūs.

Konkursā pīsadaleis deveni muzykys ansambli nu Latvejis i Leitovys izgleiteibys īstuožu: “Vilakuze” i “Baud” nu Līpuojis Muzykys, muokslys i dizaina vydsškolys, “4am” nu Alfrēda Kalniņa Cāsu muzykys vydsškolys, “MǬ” nu Ventspiļs Muzykys vydsškolys, “Kreisā krasta upmalnieki” nu Reigys Dūma kora školys, “21st Century Quintet” nu Leitovys Teatra i muzykys akademejis, “PHOENICA” nu Jelgovys Muzykys vydsškolys, kai ari Juoņa Ivanova Rēzeknis Muzykys vydsškolys puorstuovi “Sauļeites” i “Sipisnīks ar madu”.

Konkursa dalinīki atskaņuos div dažaida rakstura skaņdorbus: sova apvyda tautysdzīsmi originalaranžiejumā i breivys izvielis skaņdorba originalaranžiejumu voi originalkompoziceju, kas īkļaun etniskuos muzykys elementus.

Konkursa atkluošona nūtiks 2. majā Latgolys viestnīceibys “Gors” Mozajā zālē 14.00 stuņdēs. Organizatori aicynoj apmeklēt itū pasuokumu kluotīnē kotru, kurs gryb pīdzeivuot koč kū da ituo Latgolā nabejušu. Padūmuots ir ari par tim, kurim nabyus vareibys apmeklēt konkursu kluotīnē. Pasasokūt sadarbeibai ar Ventspiļs Muzykys vydsškolu, konkurss tiks straumāts platformā YouTube i školys Facebook lopā.