Rokstu sagataveja: portals lakuga.lv

Aglyunys bazilikys kora škola organizej XVIII Latvejis muzykys školu jaunūs vokalistu konkursu “Dziedu Dievmātei”. Konkurss nūtiks vīnā kuortā Aglyunys Bazilikys Boltajā zālē 10. majā 10.00 stuņdēs.

Konkursa mierkis ir pylnveiduot audziekņu uzastuošonys prasmis i skotivis kulturu. Konkursa aizdavumi – popularizēt akademiskuos dzīduošonys vierteibys, sekmēt latgalīšu i goreiguos muzykys kulturys tradiceju saglobuošonu, veicynuot pedagogu i audziekņu pīredzis apmaiņu. Konkurss teik organizāts Latvejis muzykys školu audzieknim vacumā nu 8 da 15 godu. Konkursā ir obligatūs dzīšmu repertuars, taipoš dalinīkim ir juonūdzīd vīna breivi izvālāta latgalīšu tautys dzīsme bez pavadejuma (a capella), dreikst izmontuot muzykys instrumentus ar nanūteiktu skanis augstumu. Konkursa nūlykums, dasacejuma veidlopa i obligatūs dzīšmu saroksts daejams ITE.

Kai stuosta Aglyunys Kora školys direktoris p. i. Gunta Gulbe-Kalvāne, itys konkurss skaitoms par goda leluokū Koru školys nūtikšonu. “Asam taidā nalelā, tok pozitivā streseņā. Ir atguojuši pyrmī dasacejumi nu Ūgris. Leluokais puornūvadnīku dalinīku izaicynuojums, prūtams, ir latgalīšu tautys dzīsmis izpiļdeišona, tok pīredze ruoda, ka dalinīki parosti ir gona labi īsatreniejuši. Iz prīškdīnom dūmojam par īspieju pyrma konkursa organizēt meistarklasis par pareizu latgalīšu volūdys izrunu,” tai Gunta Gulbe-Kalvāne.

Atguodynuosim ari par cytom aktualitatem goreigajā muzykā – napaseņ folklorys kūpa “Iļža” ir īrakstejuse albumu ap Eversmuižys goreigajim dzīduojumim, par tū vaira skaiti ITE; sovpus Rēzeknis katedralis kors “Adoramus” pārnejuo goda beiguos īrakstejs mesys latgaliski, par tū vaira skaiti ITE.