Rokstu sagataveja: portals lakuga.lv

Vaļsts prezidents Egils Levits 19. aprelī ar reikuojumu Nr. 1 “Par latviešu vēsturiskās zemes Latgales karogu” ir apstyprynuojs latvīšu viesturiskuos zemis – Latgolys – karūgu (tymsi zyls ar boltu horizontalu streipi), viestej informaceja sātyslopā president.lv.

Reikuojumā nūruodeits, ka karūgs teik apstyprynuots, pamatojūtīs iz Latvīšu viesturiskūs zemu lykuma 3. panta trešū daļu i jemūt vārā Latvīšu viesturiskūs zemu atteisteibys padūmis 2023. gods 3. apreļa prīšklykumu i Vaļsts heraldikys komisejis 2023. gods 17. apreļa atzynumu.

Latvīšu viesturiskuos zemis Latgolys karūgs ir tymsi zyls ar boltu horizontalu streipi; streipu attīceiba ir 2:1:2; karūga plotuma i garuma attīceiba ir 1:2; tymsi zyluo kruosa atbylst Pantone 295 kruosys kodam. Ar pylnu reikuojuma tekstu var īpasazeit ITE.

2021. gods 1. julī stuojuos spākā Latvīšu viesturiskūs zemu lykums, kuruo mierkis ir veicynuot latvīšu viesturiskūs zemu dzeivuotuoju kūpejū apziņu, identitati i pīdereibu, kulturtelpu saglobuošonu i ilgtspiejeigu atteisteibu.

Latvīšu viesturiskūs zemu lykuma 3. panta trešajā daļā raksteits, ka latvīšu viesturiskūs zemu gierbūņus nūsoka atsevišks lykums. Latvīšu viesturiskūs zemu karūgus piec Latvīšu viesturiskūs zemu atteisteibys padūmis prīšklykuma apstyprynoj Vaļsts prezidents, jemūt vārā Vaļsts heraldikys komisejis atzynumu.

Latvīšu viesturiskūs zemu atteisteibys padūme izveiduota ar mierki koordinēt vaļsts puorvaļdis īstuožu i pošvaļdeibu sadarbeibu i lāmumu pījimšonu vaicuojumūs par latvīšu viesturiskūs zemu identitati, kulturviesturiskuos vidis i kulturtelpu saglobuošonu i ilgtspiejeigu atteisteibu, veicūt Latvīšu viesturiskūs zemu lykumā nūsaceituos funkcejis i uzdavumus. Latgolys viesturiskuos zemis sabīdreibys puorstuovs tamā ir Dainis Mjartāns, bet tuos pošvaļdeibys puorstuov Rēzeknis nūvoda dūmis prīšksādātuoja vītneica Ērika Teirumnieka.