Rokstu sagataveja: portals lakuga.lv

Ituo gods 23. aprelī Leivuona nūvoda folklorys kūpa “Ceiruleits” sajēme Latvejis Folklorys bīdreibys apbolvuojumu “Austras koks” nominacejā “Latviskās dzīvesziņas kopšana un daudzināšana”. “Ceiruleits” i tuo vadeituoja Anna Kārkle folklorys nūzarē dorbojās jau vaira nakai 30 godus.

Latvejis Folklorys bīdreiba folklorys bolvu “Austra koks” pasnādz jau pīktū godu, izviertejūt pārnejuo goda nūtikšonys i procesus tradicionaluos kulturys puormontojameibā. Bolva “Austras koks” teik pasnāgta treis nominacejuos “Mūža ieguldījums”, “Latviskās dzīvesziņas kopšana un daudzināšana” i “Aktivitātes folkloras jomā”. Itūgod nominacejā “Mūža ieguldījums” bolvu sajēme Rucavys etnografiskuo ansambļa vadeituoja Stanislava Skudike. Nominacejā “Aktivitātes folkloras jomā” bolvu sajēme veiru kūpa “Vilki”.

Sovpus nominacejā “Latviskās dzīvesziņas kopšana un daudzināšana” bolvu sajēme Leivuona nūvoda folklorys kūpa “Ceiruleits” i tuo vadeituoja Anna Kārkle, kura folklorys nūzarē dorbojās jau vaira nakai 30 godu. Intervejā portalam lakuga.lv Anna Kārkle sovulaik stuosteja, ka: “Ceiruleiša” dzīšmu celi aizvaduši iz daudzom pasauļa molom, gondreiž iz vysim kontinentim. Mes Leivuona vuordu pasaulī iznasam na tikai ar sovom dzīsmem i daņčim, bet ari tuoli ir aizceļuojuši Leivuona stykla putyneni. Prīca, ka mes asam pamaneiti i nūvārtāti na tikai myusu piļsātā i nūvodā, bet ari Latvejis mārūgā i tuoli aiz juos rūbežim.” Vysu interveju ar Annu skaiti ITE.

Sovpus par sovom sajiutom, sajemūt apbolvuojumu “Austras koks” i runojūt par planim iz prīšku, Anna stuosta: “Var saceit, ka “Austras koks” ir leluokais goda apbolvuojums foklorā, deļ tam cīši lela prīca, ka tys lelais īguļdeitais dorbs teik ari nūvārtāts. I tys dorbs jau nasarymst, niu taisomēs iz Dzīšmu i deju svātkim, nu Leivuona nūvoda brauks div grupys i 60 cylvāku, īspiejams, byusim leluokais kolektivs. Vystik vēļ da tuo mums pošym Leivuonu nūvoda Kulturys centrā 27. aprelī byus lels pasuokums – Dīnvydlatgolys i Sielejis bārnu i jaunīšu folklorys svātki-skate “Darbeņš maņ prīku deve”. Koncerts byus div daļuos – nu suoku Dīnvdylatgolys sasasaukšona, tod ūtrajā daļā rodūšuos darbneicys “Sēlija rotā”, kur byus celu jūstu ausšona, lupotu deču tamburiešona, byus ari kulinarais montuojums i cytys aktivitatis. Nūslāgumā kuorteigi izaļustēsim kūpdaņčūs i kūprūtaļuos. Itys pasuokums nūteik ar Vaļsts izgleiteibys i satura centra i Vaļsts Kulturkapitala fonda atbolstu.”