Rokstu sagataveja: portals lakuga.lv

Sastdiņ, 6. majā, 14 stuņdēs Rēzeknis nūvoda Rykovys pogosta Kūrpinīkūs atkluos atjaunuotū Kūrpinīku krucifiksu. Tys sovu atpazeistameibu ir dabuojs vairuoku īmesļu deļ. Vysupyrma jau ar tuo vizualū tālu – krysta nūjume ar boltom kolonom skaisti īsakļaun apleicejā lauku ainovā, veidojūt dominanti, kas radzama jau nu attuoluma. Pīminiešonys vārts ir ari fakts, ka pi ituo krucifiksa filmātys ainys nu Juoņa Streiča 1991. godā uzjimtuos kinys “Cilvēka bērns”.

Vairuoku godu garumā Rēzeknis nūvoda Kūrpinīku krucifikss beja cīši biedeigā kai vizualā, tai i tehniskā stuovūklī. Tok pārņ Rēzeknis nūvoda pošvaļdeiba kūpā ar Drycānu pogostu apvīneibys Rykovys pogosta puorvaļdi aizsuoce apsekuošonys i rekonstrukcejis dorbus. Pārņ portalam lakuga.lv Drycānu pogostu apvīneibys Rykovys pogosta puorvaļdis vadeituojs Andrejs Tārauds pastreipuoja, ka koč ari Kūrpinīku krucifikss nav kulturys pīminekļu sarokstā, teik plānuots tū ryupeigai atjaunuot taidā pošā skotā, kaidā bejs, realizejūt sakūpšonys, na puorveidis dorbus.

Sastdiņ, 6. majā, 14 stuņdēs byus atjaunuotuo krucifiksa atkluošona, sovpus 15 stuņdēs gaidomi Latgolā tradicionalī maja dzīduojumi. Kai niu stuosta Andrejs Tārauds, tod, koč i atjaunuošonys dorbi nav guojuši pavysam vīgli, dorbi ir pabeigti i izdareiti taidā apjūmā, kai suokumā tyka sūleits. VAS “Latvijas Valsts ceļi” tyka sūlejuši 150 m garumā da krucifiksa i 150 m garumā aiz krucifiksa izkluot dubultviersu, tys gon nav padareits, tok vysmoz ir pabārta škemba, sovpus nu pošvaļdeibys pusis ceļš garum krucifiksam tiks apstruoduots ar pretputekļu reagentu. “Da atkluošonai vēļ turpynuosim dorbus ari pi apzaļumuošonys, sovpus atkluošonā plānuots ari īstateit divejus ūzulus. Paradzāts, ka pasuokumā pīsadaleis prīsters Rinalds Stankevičs i režisors Juoņs Streičs,” stuosta Drycānu pogostu apvīneibys Rykovys pogosta puorvaļdis vadeituojs Andrejs Tārauds.