Rokstu sagataveja: Edeite Husare, portals lakuga.lv

Sastdiņ, 10. junī, sešuos stuņdēs vokora Latgolys viestnīceibys GORS Lelajā zālē iz 10 godu jubileja koncertu “10 atbolsūs” aicynoj Rēzeknis nūvoda vokaluo studeja “Skonai”. Kai viestej koncerta reikuotuoju publicātuo informaceja, svātku koncertprogramā byus vareiba dzierdēt kai “Skonai” repertuara zynomūs skaņdorbus, tai i jaunus.

Rēzeknis nūvoda vokaluo studeja “Skonai”, kurys dybynuotuoja i muokslinīcyskuo vadeituoja ir dzīduotuoja, pedagoge Guntra Kuzmina-Jukna, roduos 2013. godā. Portalam lakuga.lv Guntra soka: “Tys ir vīns nu leluokūs munu dzeivis nūtykumu, lobuokuo ideja i lobuokais, kū asu aizsuokuse! Kod beju moza, maņ jau tod beja sapyns, kab maņ byutu taida vokaluo studeja, jo bierneibā cīši patyka dalikt sevkurai dzīsmei ūtrū bolsu, izdūmuot vysaidys harmonejis, dreiži īsavuiceju iz klavīru spēlēt vysaidus pavadejumus. Kur vēļ lobuok, ka ir kaids taids ansamblis, ar kuru dorbuotīs i kurā izapaust!” Guntra stuosta, ka saprotuse, ka gryb i var koč kū dareit, raksteit latgaliski, jo asūt pyrma tuo raudzejuse i cytuos volūduos, tod ar laiku saprotuse, ka latgaliskais jai saīt i tū nūviertej.

“Kod braucu iz skatem ar sovu pyrmū vokalū ansambli “Knifs”, myusus eistyn nūvērtēja latgaliskuo piec – dzīduotuos tautysdzīšmu apdaris i munys originaldzīsmis. Tys beja taids mudynuojums dareit i turpynuot tū, kas aizsuokts,” atmiņom pasadola Guntra.

“Skonai” izaveiduoja, kod Guntra Kuzmina-Jukna studējuse magistranturys pādejā kursā i gatavejās pabeigt augstškolu. 2013. gods janvarī jai bejuse saruna ari ar niulinejū Rēzeknis novada pošvaļeibys vadeituoju Monvīdu Švarcu, kurs mudynuojs: “Guntra, brauc atpakaļ pi myusu iz Latgolu, mums vajag studeju, vajag ansambļus, spākus ite!” Vokaluos studejis vadeituoja stuosta, ka jai bejuši pīduovuojumi palikt Reigā, tok speiteigi izdūmuojuse, ka brauks atpakaļ, jo ari Latgolai vajagūt ļauds, kurī gryb, var i dora. Nūzeime bejuse ari tam, ka pyrma goda beja satykuse sovu veiru, kurs ir doncuotuojs i sporta pedagogs (Edgars Jukna – red.). Tai kai daudzom leidzeigom studejom pyrma dzīduošonys ir ari kusteibu nūdarbeibys, kod dzīduotuoji izakust, īsavuica daudzys lītys dareit ritmā, leidza ar tū jau obeji izdūmuojuši, ka byutu breineigi, ka ari rodūšajā sferā byutu nazkas kūpejs, kaids kolektivs, kurā dorbuotīs. Guntra ir cīši pateiceiga Rēzeknis nūvodam, ka vēļ arviņ sajem taidu atbolstu, taipat prīceiga, ka iz “Skonai” īt bārni i bez kaidu ībyldumu dzīd latgaliski, kai ari prosa arviņ jaunys dzīsmis. Muokslinīcyskuo vadeituoja stuosta, ka jau pi darbeibys nūsacejumu ir defināts, ka aptyvai 80 % “Skonai” repertuara byušūt latgaliski.

Taipat Guntra izstuosta ari “Skonai” nūsakuma rasšonūs, kur lela pateiceiba asūt juos grupys bīdram “Borowa MC” i “Poparts”, gitaristam Ingaram Gusānam: “Koč kai par reizi zvaneju jam, ka byus studeja i vajag nūsaukuma idejis. Ingars pasaceja, ka padūmuos, i kaidu dīnu sajiemu vīnkuorši eisziņu nu juo ar vīnu vuordu “Skonai”. Saprotu, ka nui, tys maņ cīši pateik, jo “skonai” ir saisteits ar skaniešonu i kur ansambļam vēļ lobuoku nūsaukumu. Svareigi beja ari, ka nūsaukumā nav garumzeimu. Īpasatyka par reizi i pascejom – tys ir myusejais!”

Kai soka Guntra, ka juoraksturoj itī pyrmū 10 godi trejūs atslāga vuordūs, tod jei izalaseitu vuordus: īdviesme, speits i magiska kūpabyušona: “Mes sasavalkam kai magneti, vīns ar ūtru aprūnam i eistyn saucam sevi par saimi. Īdviesme vajadzeiga, vokalajai studejai rokstūt dorbus, nu, ka īdviesmis i energejis apmainis nav, tod nikas naīt iz prīšku. Speits ir vajadzeigs cīši, jo itūs godus nav guojs vīgli, bejuši dažaidi apstuokli i situacejis. Par pīmāru, tys pats kovida laiks, kod kai daleibnīkim, tai i vadeituojim beja cīši lels puorbaudejums mums vysim. Mani personeigi tys laiks cīši izsmēle, nabeja īdviesmis, jo nabeja dzeiva kolektiva, kam raksteit dzīsmis. Cīši gaideju, kod tys beigsīs. Tei kūpā byušona vajadzeiga taišni dzeivā kontaktā – mums nav tik mieginuojumi, ir dažaidi pasuokumi, rodūšuos nūmetnis, dzīšmu raksteišonys studejuos, videoklipu fiļmiešonys. Tuos vysys uorpus mieginuojumu satur kolektivu kūpā!”

Koncerta, kurs 10. junī skanēs Latgolys viestnīceibā GORS, gaidoms vysaids repertuars – kai zynomys dzīsmis, tai ari jauni skaņdorbi, kū dzīduos i mozuos grupys, i vacuokuos. Repertuara daudzveideibu koncertā nūsaceis ari tys, ka “Skonai” ir vysaidys vacuma grupys – nu mozūs bārnu, kam niu viņ 4–5 godi, da taidu, kurim asūt jau 25. “Pa itim godim koncertprogramu ir bejs cīši daudz! Juoatguodoj myusu pyrmais koncertizvadums “Dasadūrt dabasim”, kas sovulaik skanēja ari iz GORA skotivis, taipat bejuši videoklipi, nūmetnis, Zīmyssvātku sasatikšonu tradiceja, Rēzeknis nūvoda dīnys, festivali i pasuokumi cytur Latvejā,” par pyrmū rodūšū godu desmiti stuosta Guntra.

Koncerta nūsaukums “10 atbolsūs” asūt rezultats taidai kai ideju aptaujai vysim vokaluos studejis daleibnīkim i vacuokim. “Beja dažaidi nūsaukumi, tok tūs atbolsus sasaistu ari drupeit ar sevi. Jau bierneibā meklieju, kur ir tī atbolsi – mežā, pļovā, kolna golā, maņ patyka klauseitīs, ka tys bolss skaņ. Koncerta idejā ir ari atbolsi teiri harmoniski – kai myusu bolsi skaņ kūpā, kai jī atsabolsoj. Ari filozofiskā vierzīnī, atsaverūt iz itūs godi – kas ir myusu atbolsi i kai atsabolsuos vēļ laikā iz prīšku. Kai ari bolsi kai taidi – myusu instruments ir bolss, kai tys myus savīnoj, myus voda i kai ar sovim bolsim spiejam īdvesmuot cytus,” koncerta nūsaukuma ideju skaidroj “Skonai” vadeituoja.

Rēzeknis nūvoda vokaluos studejis “Skonai” 10 godu jubileja koncerta “10 atbolsūs” beleti jau niu ir daīmami “Biļešu Paradīze” tierdznīceibys sistemā. Beletu cenys ir 8 i 10 eiro.