Rokstu sagataveja: Edeite Husare, portals lakuga.lv

Ruodīs, ka itūšaļt vysuos kulturys sferuos nūteik cīši daudz pasuokumu, projektu i procesu, kurūs arviņ vaira leluokā voi mozuokā daļā kluotyn ir latgaliskais. Na par vysu, kur niu pasaruoda koč kas latgaliski, ir vareiba i ari vajadzeiba sataiseit atseviškys viests, deļtuo raudzeisim pa reizei pīduovuot taidu eisu ziņu kūpsavylkumu ap kaidu nu konkretu kulturys lauku. Itūreiz par muzyku i tuos nūtikšonom aprelī/majā, kuruos cikom kas palykušys naizstuosteitys voi kai eipašuok izcaltys plotuok.

Svareiguokajā nūtikšonā Latvejis pop-hiphopā ari latgaliskuo “Lauku meiča”

Ituo gods Leldīnē ar jaunu albumu pi klauseituoju atsagrīze grupa “OLAS”, kurys pamata sastuova daleibnīki ir reperi Reiks i Pavlo (Žanis Pavlovksis). Itam albumam grupa davuse nūsaukumu “Svarīgākais notikums Latvijas pop-hiphopā”. “OLAS” sovulaik Latvejis muzykā tyka īpazeitys ar hitim “Daudz naudas”, “Zemgus Girgensons”, “Prezidents” i cytim. Koč i grupa aizasuoce kai humora projekts i tuos darbeiba nav bejuse bez puortraukumu, cytugod “OLAS” svieteis jau sovu 10 godu jubileju.

Grupys “OLAS” jaunajā albumā ir 11 dzīšmu, tok latgalīšu kulturys kontekstā gribīs izceļt vīnu nu tūs – “Lauku meiča”, kurā pīsadola ari strübergs i MAURIKS. Itei ir dzīsme, kurā dzierdama ari latgalīšu volūda. Pi latgalīšu volūdys skaniešoys dzīsmē tolkā guojs repa muokslinīks, muzikis i bītmeikers Kristaps Strūbergs, kura dzymtuo puse ir Viļāni. Sovulaik muzykā suocs dorbuotīs kai milktune, bejs grupys “Singapūras Satīns” daleibnīks ar skotivis vuordu Sushi Takeout, niu aizsuocs solokarjeru kai strūbergs.

Kai soka grupys daleibnīki, dzīsmis albumā ir muzykali i tematiski daudzveideigys. “Mes poši asam cīši gandareiti par itū albumu, jo dorbs ir dalykts nūpītnys i lels! Nivīna dzīsme albumā nav dalykta tik aiz tuo, kab byutu vaira dzīšmu, mums eistyn ruodīs, ka kotra ir atseviškys hits. Tai kai albums ir cīši vysaids, tycim, ka kotrys klauseituojs atrass dzīsmi, kas jam patiks,” stuosta “OLAS”.

“Cielaviņa” i patriotiskuo dzīsme “Pīdzims Latgalī”

Ludzys Bārnu i jaunīšu centra popgrupa “Cielaviņa”, kas dreiži svieteis sovu 35 godu pastuoviešonys jubileju, šaļteņu pyrma vaļsts svātku, 3. majā, publicējuse patriotisku dzīsmi i videoklipu ar Marijis Jefremovys vuordim i muzyku “Pīdzims Latgalī”.

Popgrupa “Cielaviņa” i tuos vadeituoja Lolita Greitāne aktivi popularizej dzīsmis latgalīšu volūdā. Grupai da ituo izguojuši vairuoki albumi – 2005. godā “Esmu Ludzai pierakstīts” i 2014. godā “Ciemos pie “Cielaviņas” Ludzā”. Vīna nu popularuokūs popgrupys “Cielaviņa” dzīšmu, kas sovulaik daudz skanējuse Latgolys Radejā i īkļauta ari “Latgolys Radejis dzīšmu izlasē # 1” beja kūpā ar Ultimatu (Ivo Grigaļa nu grupys “Latgalīšu Reps” pseidonims sovulaik) dzīsme “Oi, Dīveni”.

“Sipisnīks ar madu” skanēs “Boņukā 2023”

Rēzeknē, 2. majā, Latgolys viestnīceibys GORS Mozajā zālē pyrmū reizi izskanēja Juoņa Ivanova Rēzeknis muzykys vydsškolys reikuotais storptautyskais etnodžeza konkurss “Guoyu pa JAZZ”, par kuru vaira var puorskaiteit ITE.

Koč i konkursā par uzvarātuojim tyka atzeiti ventspiļnīki “MǬ”, tok nu konkursantu gribīs izceļt pošu Juoņa Ivanova Rēzeknis muzykys vydsškolys ansambli “Sipisnīks ar madu” i jo eipaši jaunū džeza (i na tik) dzīduotuoju Lauru Svikšu. “Sipisnīks ar madu” ar Laurys skaņdorbu “Maņ vajag moz”, kurs speciali konkursam skanēja vaira etnomuzykys kruosuos, dabuoja vareibu uzastuot 2024. goda 2. martā paradzātajā Latgalīšu kulturys goda bolvys “Boņuks 2023” ceremonejā. Apvīneibys uzastuošonu konkursā var nūsavērt ITE.

Jau dīnu piečuok, 3. majā, Laura Svikša beja ari vīna nu latgaliskuo koncerta “Celīs, bruoļ!” muokslinīku. Tycim, ka Laura Svikša ir vuords, kū eistyn vajadzēs atguoduot na tik latgalīšu muzykys laukā viņ.