Rokstu sagataveja: portals lakuga.lv

Itūreiz ar sovim kulturys īsacejumim doluos turisma grupu gids, ceļuotuojs i stuostnīks Lauris Magazeiņs. Itūšaļt Lauris gona bīži organizej vysaiduoka veida puorguojīņus ari Latgolys pusē, jaunumim var sekuot leidza juo Facebook lopā ITE, sovpus par vīnu tuoluoku ceļuojumu iz Maroku Lauris ir pīrakstejs pīzeimis, kurys var puorskaiteit ITE.

Vysi iz Ontona dīnys ļustem Rekovys kulturys nomā

Iz maja mieneša trešuos nedelis skriņča stuovūt, gribīs vysim nūvielēt šmuku pavasari. Ka īprīškejuo nedeļa beja pasolta, niu ir laiks sasasiļdeit i īlaist pavasari sovā sirdī. Tam nūteikti leidzēs daudzveideigais kulturys pasuokumu kluosts Latgolā nedeļā nu 15. da 21. maja. Kulturys nūtykumu apsavieršonu īsuoksim ar Zīmeļlatgolu – Rekovys kulturys noms ūtardiņ 16. majā gaida gostūs iz Ontona dīnys ļustem.

Daugovpiļs muokslineicys izstuode Rēzeknē “Katram ir sava Enerģētika”

Vierzūtīs pa kalendaru i ari Latgolys karti iz leju, juoizceļ trešdiņ, 17. majā, paradzātuo Daugovpiļs muokslineicys Alīnys Petkunis izstuodis “Katram ir sava Enerģētika” atkluošona Latgolys Kulturviesturis muzejā Rēzeknē.

Nedeļgolā iz Rūžupi i Rēzekni

Sovpus nedeļgols aicynoj iz aktivitatem dobā. Par kū nanūbraukt iz Leivuona nūvoda Rūžupi, kur sastdiņ 20. majā vītejā estradē ir griliešonys sezonys atkluošona. Tymā pošā sastdīnis, 20. maja, vokorā Latgolys viestnīceiba “Gors” turpynoj svieteit 10 godu jubileju i aicynoj iz koncertizvadumu “Ziedonis”. Fantastiska īspieja kluotīnē dzierdēt Renāru Kauperu, Latvejis Radejis kori i jūs instrumentalū grupu. Kab mums vysim mīreiga dorba nedeļa i atpyutys pylns nedeļgols!