Rokstu sagataveja: portals lakuga.lv

2. junī Lūznovys muižā nūtiks Latgolys turisma nūzaris darbinīku kluotīnis forums “Esi i dori” i rodūšuos darbneicys, informej pasuokuma organizatoru puorstuove Santa Rudze. Foruma laikā byus turisma, marketinga i vaļsts sektora puorstuovu lekcejis, kai ari praktiskys nūdarbeibys, kuruos turisma nūzaris daleibnīki dazynuos idejis i tiks pi praktisku īmaņu turisma biznesa atteisteibai. Pasuokumā gaideiti Latgolys i cytu nūvodu turisma nūzaris daleibnīki, uzjiemieji i entuziasti.

Pasuokumā daleibnīki dazynuos par turisma aktualitatem, uorzemu pīredzi, kai ari tiks pi praktisku marketinga īmaņu sova turisma biznesa atteisteibai.

Pasuokumā pīsadaleis Pūlejis viestneica Latvejā Monika Mihališina, kura akcentēs kūpeigys viesturis pavedīņus, mudynojūt tūs izmontuot turisma produktu i pakalpuojumu atteisteibai Latgolā, i digitaluo marketinga specialiste Sindija Bokāne, kas vadeis praktiskū nūdarbeibu par reklamys satura izstruodi digitalajā vidē. BalticTravelnews.com direktors Aivars Mackevičs, Latgolys Turisma asociacejis vaļdis vadeituoja Jeļena Kijaško, Vydzemis Augstškolys profesore Aija van der Steina, kai ari Latgolys kulturys bīdreibys vadeituoja Ilga Šuplinska kotrys nu sova skotu punkta pīduovuos verseju par stuosta nūzeimeibu turisma vidis kontekstā, rodūšuo marketinga specialists Raimonds Platacis daleisīs pīredzē par marketinga instrumentim turismā. Sovpus Latvejis Investiceju atteisteibys agenturys (LIAA) Klientu apkolpuošonys nūdalis vadeituoja Inga Maļina, kas stuosteis par LIAA atbolstu turismam.

Daleiba itamā pasuokumā ir bez moksys. Kab pīsadaleitu, ir juosaregistrej ITE.

Projekts teik eistynuots, realizejūt Latgolys kongresa rezoluceju, izgleitojūt sabīdreibu piļsūniskuos leidzdaleibys vaicuojumūs i uzturūt kūpdarbeibys aktivitatis vysaidu nūzaru grupuos. 2023. godā ir plānuoti div kluotīnis i pīci tīšsaistis pasuokumi, kas byus veļteiti vysaidom Latgolys kongresa rezolucejis temom: izgleiteiba, uzjiemiejdarbeibys atteisteiba, drūšeiba. Sevkurā pasuokumā pīsadaleis atbylstušuos jūmys puorstuovi Latgolys regionā. Kab veicynuotu teiklūšonūs i sadarbeibys veiduošonu, foruma daleibai aicynuoti nūvodu aktivuokī izgleiteibys, kulturys īstuožu, NVO i pošvaļdeibys īstuožu puorstuovi.

Pasuokumu organizej: Latgalīšu kulturys bīdreiba, Rēzeknis nūvoda pošvaļdeiba i Latgolys kongresa lāmumu izpiļdis padūme.

Projektu “Latgalīšu kūpīnys lidereibys i pīdereibys styprynuošona, eistynojūt Latgolys kongresa idejis” finansiali atbolsta Sabīdreibys integracejis fonds nu Kulturys ministrejis dūtajim Latvejis vaļsts budžeta leidzeklim. Projekts teik realizāts nu 03.04.2022. da 31.10.2024.