Rokstu sagataveja: portals lakuga.lv

27. majā 19.00 stuņdēs Rogovkā, pi Nautrānu sporta hallis-KN (leita laikā – īšktelpuos), nūtiks jau 12. tautys muzykantu saīts i daņču vokors – večerinka “O, bļaka!”, informej tuos reikuotuoji.

Kotru godu maja beiguos Rogovkā, kas ir Ontona Kūkuoja dzymtuo puse, nūteik tautys muzykantu i daņču saīts ar nūsaukumu – večerinka “O, bļaka!”. Pasuokuma nūsaukums pīmāruots nu skuorda lūksnis nūsaukuma latgaliski, pa kurū izsytūt, skaņa tuoli dzierdama. Tys izdūmuots tautys muzykantu, saimis i sābru kūpeigys muziciešonys laikā Ontona Kūkuoja dzymtajā sātā, kur bļaka tyka izmontuota kai muzykys instruments, pa tū izsytūt ar pagali. Piec Ontona Kūkuoja nuovis Nautrānu pogosta puorvaļde īdybynuoja tradiceju taiseit tautys muzykantu saītu ar juo dūtū nosaukumu.

Ari itūgod bīdreiba “Rogovkīši” ar Nautrānu pogosta puorvaļdis i sponsoru paleigu 27. majā 19.00 stuņdēs reikoj tautys muzykantu saītu i daņču vokoru Rogovkā. Pīsadaleit pasuokumā ir pasūlejuši tautys muzykanti nu tyvuokys i tuoluokys apleicīnis: Pīters Bilinskis, Ontons Savickis, Anna Viškere, Vinsents Kūkuojs (Rēzeknis nūvods), Eventijs Zelčs, Leons Bērziņš, Genādijs Rudukovs, Venārs Dūre, Vitālijs Plešs, Kristiāns Šaicāns, Andris Kazinovskis (Bolvu nūvods), Dainis Ločmelis (Ludzys nūvods), Aleksandrs Boginskis, Juoņs Mukāns, Juoņs Gipters (Daugovpiļs), Nikolajs Zaharovs (Reiga) i cyti. Pasuokumu kuplynuos ari Baļtinovys kapela, “Kociņu kapela” (Ciesis), kapela “Retro” (Guļbine), Igauņu saime (Rēzeknis nūvods), kapela “Sveicynojom, vielejom” (Saļņova).

Bīdreibys “Rogovkīši” vaļdis lūcekle Marija Mazure pastreipoj, ka večerinka vysod beidzās tik ar reita gaismu, kod dažs lobs Rogovkys dzeivuotuojs jau īt gūvu slauktu!