Rokstu sagataveja: portals lakuga.lv

17. junī, sastdīnē pyrma Juoņa dīnys, Lelajā latgaļu tiergā Ludzā sasatiks omotu meistari nu vysys Latvejis, kab radeitu naatkuortojamu vosorys saulgrīžu svātku sajiutu, informej Ludzys nūvoda turisma centra puorstuove Inga Zagorska. Cikom Ludzys vydslaiku piļsdrupuos vēļ nūteik byuvdorbi, tierga dalinīki puļcēsīs Ludzys nūvoda pošvaļdeibys laukumā Raiņa īlā 16, kur nu 9 reitā leidz pat piecpušdīnai nūtiks tierguošonuos i svātku koncerts.

Jau nu 9.00 stuņdem reitā kūpā ar pasuokuma vadeituojim Ēriku Zepu i Līgu Kondrāti Ludzys piļsātu pīskandynuos dzīsmis i dejis. Koncerta laikā uzastuos nūvadnīku īcīneituos folklorys kūpys “Ilža” i “Žibuļeits”, kai ari gosti: “Rekavas dzintars” i “Dziga”. Ar ļusteigu deju sūli prīcynuos vītejuos deju kūpys i doncuotuoji nu Bolvu nūvoda, sovpus tautys muzike i lībīšu dzīduotuoja Julgī Stalte i atraktivais latgalīts Ēriks Zeps boguotynuos koncertprogramu ar skaņdorbim, kurūs sasavyn līviskais rimtums ar latgaliskū azartu. Buozovys etnografiskais ansamblis i kapelys “Malnavas muzikanti” i “Rūvenas aure” pasaryupēs par daņčim i rūtaļdejom, kur varēs īsasaisteit vysi tierga apmaklātuoji.

Lelais latgaļu tiergs byus boguots ar meistarklasem i vareibu vuiceitīs na tik praktiskys lītys, tok ari tikt pi vierteigu zynuošonu kasdīnai. Kūpā ar kūkamatnīku Edgaru Matisānu varēs sataiseit kūka beņčeišus, Ingūna Rauda aicynuos iz darbneicom bārnim i meistardarbneicu “Senejūs lītu ūtrei dzeive”, bīdreiba “Musturprieks” īpazeistynuos ar Ludzys apriņka rokstim cymdūs i zečēs. Mārīte Kronberga meistardarbneicā “Duorzs veseleibai – iedīni nu duorza veļšu” snēgs īskotu, kai nu duorza veļtem gataveit gordys lītys. Rodūšajim byus vareiba pīsadaleit gleznuošonys klasē kūpā ar Ludzys Jura Soikāna Muokslys školu, Ruta Zviedre stuosteis i ruodeis tradicejis “Juoņu tārps, vaiņuks i rūta”.