Rokstu sagataveja: portals lakuga.lv

Sastdiņ, 10. junī, Augšdaugovys nūvoda Naujinis pogosta Slutišku sādžā nūtiks Tautys muokslys festivals “Augšdaugava 2023”, kurs itūgod ir veļteits Lelajam Augšdaugovys musturdečam. Teik planavuots, ka Lelais Augšdaugovys musturdečs tiks īkļauts ari Ginesa Pasauļa rekordu gruomotā kai leluokais taida veida rūkdorbs, viestej organizatoru sagataveituo informaceja.

Vēļ 2011. godā Storptautyskuos akcejis “Muzeju nakts” laikā tyka aizsuokta Leluo Augšdaugovys musturdeča veiduošona. Musturdečs ir veiduots nu daudzim gabalenim, kotrs nu tim izgatavuots tamburiešonys, ausšonys voi adeišonys tehnikā. Deča veiduošona suokta par gūdu Naujinis Nūvodpietnīceibys muzeja 15 godu jubilejai, ideja pīdar muzeja direktorei Evitai Kusiņai-Kolesnikovai.

Nu suoku mierkis beja sataiseit 500 metru plotu i 80 cm garu izrakstātu deči. Akcejā vareja īsasaisteit sevkurs interesents, nūaužūt, nūtaburejūt voi nūadūt 10×10 cm voi 20×20 cm dorba fragmentu (kvadratu). Tok ar laiku cylvāku gribiešona īsasaisteit bejuse tik lela, ka niu precizu dalinīku skaitu pat navar nūsaceit, tok tys nūteikti puorsnādz 5000, viestej organizatoru informaceja.

Itūšaļt musturdeča plotums ir 1,6 metru, cikom kas garums 508 metru. Vīna nu rūkdarbneicu ir 84 godus vacuo Talsu nūvoda Valdgalis pogosta dzeivuotuoja Zofija Maurere, kur par Augšdaugovys musturdeči dazynuojuse 2016. godā i kūpā ar bejušū kolegi īsaistejušys akcejā 141 dalinīku. “Maņ roduos dūma īadeit koč kū Latvejis dobai rakstureigu – putynus, tauriņus, dzeivinīkus, pučis. Tod īguoja pruotā, ka vajadzātu tūs cylvāku vuordus, kuri stuovejuši pi Latvejis Republikys izveidis šyupeļa. Pīcu godu laikā maņ saguoja 44,8 metri,” stuosta rūkdarbneica Zofija Maurere. Kūpumā musturdeča veiduošonā īsasaistejuši dalinīki na viņ nu Latvejis, tok ari nu Bulgarejis, Igaunejis, Pūlejis, Rumanejis, Vuocejis i c. vaļstim. Teik planavuots, ka Lelais Augšdaugovys musturdečs tiks īkļauts ari Ginesa Pasauļa rekordu gruomotā kai leluokais taida veida rūkdorbs.

Niu, 10. junī, Augšdaugovys nūvoda Naujinis pogosta Slutišķu sādžā ar plotu svātku programu nūtiks Tautys muokslys festivals “Augšdaugava 2023”, kura laikā musturdečs tiks puorviļkts nu vīna Daugovys krosta iz ūtru. Festivalā pīsadaleis lels skaits Augšdaugovys nūvoda amatermuokslys kolektivu (tymā vydā kulturys centra “Vārpa” deju ansamblis “Līksme”, folklorys kūpa “Dyrbyni”, Ambeļu Kulturys noma folklorys kūpa “Speiga”, Dubnys Kulturys noma folklorys kūpa “Atzola”, Naujinis Kultūrys centra folklorys kūpa “Rūžeņa” i c.). Eipašī gosti – akters Jēkabs Reinis, muzikis Jurs Ostrovskis, multimuokslinīks Māris Susejs, muzikis Arņs Slobožanins.

Dīnys parāds:

Atpyutys vītā “Latgales sēta”

• 14 stuņdēs – “Metu tiltu pār Daugavu” Leluo Augšdaugovys musturdeča tylta atkluošona
• 14.30 stuņdēs – “Raibu raibie musturi” dīnys koncerti
• 17 stuņdēs – Vyslatvejis iudiņa turistu saīta “Lielais plosts” dalinīku sagaideišona
• 18.30 stuņdēs – “Musturu musturiem” lelkoncerts.

Slutišku vacticeibnīku lauku sātā

• 15-17 stuņdem – “Musturotā saimes ikdiena”. Vacticeibnīku kulinaruo montuojuma meistarklasis, dzīduošona, rūtalis i daņči.
• 15 i 17 stuņdēs – ekskursejis ar gidu.

Vysā festivala teritorejā

Amatnīku i sātys ražuotuoju tierdzeņš. Rodūšuos darbneicys i aktivitatis.