Rokstu sagataveja: portals lakuga.lv

Aktivi īsasuocūt turisma sezonai, ituos nedelis īsacejumus lyudzam sagataveit piļsātvidis pietnīkam, ceļuotuojam i fotografam Andrim Uškānam. Andris pats daudzi ceļoj i izzynoj na tik sovu apleicīni, tok ari pasauli. Juo pīdzeivuojumu dīnysgruomotu vari skaiteit ITE.

Mieneša vāruošonys braucīņs Rāznā

Myusu kasdīna pylna ar drudžainu steigu, satraukumim, planim, dedlainim, dzeivis problemom i vairums nu myusu nalelu atelpu giust ar Netflix, socialū portalu, datorspieļu voi cytys digitalizacejis paleidzeibu. Tok tys tik īvierzej dūmys cytā plāksne, kab tiuleņ atsagrīstu pi sirdei tyvūs problemu.

Sovu reizi ir vārts izaraut nu apbūrtuo lūka i atteireit golvu, i par tū na vysod juomoksoj symtim eiro par koučinga, meditacejis voi jogys sesejom. Ite pi myusu, Latgolys jiurā – Rāznā –, var saplyust ar dobys skaņom, atslādzūt puorejūs sensorūs kairynuotuojus. Izteireit golvu līgajā vokora viejā draugu kompanejā iz buru laivys kluoja.

3. junī piec saulis rīta, desmit stuņdēs vokorā nu Zīdu kolna pīstuotnis atīt jahta “Sea Esta”, kab brauktu dobys i mieness baudeišonys braucīnī. Daleiba braucīnī moksoj 10 euro, bet pīsasaceišona nūteik pa teleponu 29833890. Vītu skaits iz kluoja ir īrūbežuots.

Rēzeknis viesturis izzynuošona i dokumentiešona

Cik bīži īmūt pa īlu mes sev aizdūdam itaidus vaicuojumus: “Interesanti, cik itai sātai godu?”, “Kū ir pīredziejušys ituos, laika zūba sagrauztuos sīnys?”, “Kai ite varēje izavērt pyrma 100 godu?”. Rezeknē iz itim vaicuojumim rauga atbiļdēt viesturis entuziastu grupa “Nezināmā Rēzekne”. Paraleli dorbojūtīs kai tīšsaistē, tai piļsātys īluos, viesturis entuziasti pīsaista vysaidu nūzaru specialistus, kab grautu viesturiskūs mitus, atkluotu vītu viesturi, maklātu pagaisušuos ceļtnis i runuotu par kulturviesturiskūs vierteibu saglobuošonys vajadzeibu.

“Nezināmā Rēzekne” reikoj ekspediceju puorguojīņus, kurūs var pīsadaleit sevkurs, kuru interesej vītu viesture voi vide, kurā mes dzeivojam. “Nezināmā Rēzekne” atvārta vysim prīškzynuošonu leiminim i vacumim. Puorguojīņus ir vadejuši kai prominenti, vysā vaļstī pazeistami vydslaiku viesturis specialisti i pīminiekļu aizsardzeibys specialisti, tai 8. klasis školneica, kura izstruoduojuse zynuotniski pietnīciskū dorbu par industialū montuojumu. Gondreiž kotrā puorguojīnī teik atkluots naz kas jauns, da šam nazynoms voi aizmiersts.

Itymā nedeļgolā puorguojīņs suoksīs catūrtdiņ, 1. junī, sešuos stuņdēs vokora ar sasatikšonu “Lidl” skvera prīškā pi viadukta.

Izbrauc nu stereotipiskūs rūbežu

Dūmuošonys process patierej miļzeigu energejis daudzumu, partū myusu smedzini evolucionari ir izstruoduojuši sovys viļteibys, kai itū energeju optimizēt. Rezultatā mes asam tykuši pi tuo, kū šudiņ ar drupeit nagativu konotaceju sauc par stereotipim i stereotipisku dūmuošonu. Tok kai soka internetūs – “tys nav bags, tei ir fīča”. Tys dūd smedzinim struoduot efektivuok, patierejūt īvāruojami mozuok energejis.

Tymā pošā laikā stereotipi īvārojami īrūbežoj myusu jaunū pīredzi. Ka mes dūmojam par izbraukšonu zaļumūs, kū apsavērt, kur paēst, tod atguodojam popularuokuos vītys, tuos, kur asam bejuši voi tuos, kurys napaseņ asam redziejuši Instagram lentā.

Itūs dūmuošonys mehanismus var apīt vysaidim leidzeklim, par pīmāru, izalosam, cik daudzi laika i daguļa asam gotovi tērēt, jemam karti, īzeimejam apli ar radiusu, saceisim, 150 km ap myusu atsarasšonys vītu. Tuoļuok braucam ar pierstu pa riņča linteju i izavielejam punktu, kur naasam bejuši. Krovojam sumkys, braucam iz nazynomū i baudom skotus sovom acim!

Itai metodei var izdūmuot papyldu nūsacejumus, par pīmāru – raudzeit izbraukt piec vareibys tyuli pa īvylktū lineju, izraudzeit vītys ībokstūt kartē ar acim cīt. Dīvamžāļ, juoignorej Šengenys zonā naītylpstūšuos vaļsts, tok vysaidus nagaideitus atkluojumus var izdareit ari pi sātys.

Tīšsaistis resurss, kas zeimoj lineju kartē ITE.