Roksta autore: Laura Spundere, portals lakuga.lv

Kod niu ir īsastuojs sylts i vasareigs laiks, byutu grāks vosorys suokumu i breivdīnys pavadeit ustobuos. Itamā nedeļā pasuokumu daudzveideiba lutynoj, bet ītūšaļt kai sovu īsacejumu pīduovojam pa vīnam pasuokumam latgaliskuos nūskaņuos vairuokuos vītuos Latgolā.

Latgolys vargaņu dīnys i zīduojumi Leiksnys bazneicai

Trešdiņ, 31. majā, Daugovpilī suocēs kasgadejuos Latgolys vargaņu dīnys. Festivals itūgod skaņ jau 14. reizi. Catūrtdiņ, 1. junī, 18.30 stuņdēs, Daugovpiļs Dīva žielesteibys Romys katuoļu bazneicā (Višķu īla 36) izskanēs koncertmeditaceja “Svētā mīla”. Koncertā pīsadaleis vīna nu kasgadejūs Latgolys vargaņu dīnu organizatoru – Larisa Carjkova (varganis) i Juris Vizbulis (tenors). Kūpā ar muzikim, veidojūt kūpeigu muzykys i vuordu stuostu, meditēs prīsters Aigars Bernāns, bet pītkdiņ, 2. junī, Leiksnā iz koncertmeditaceju “Spēkavots” aicynoj muziķu saime – akordeonists Aldis Kise i varganiste Guna Kise. Īīšona obejūs koncertūs par zīduojumim deļ Leiksnys Vysusvātuos Jezus Sirds Romys katuoļu bazneicys vargaņu restauracejis. Vaira par festivala koncertim ITE.

Zaļumballe Rēzeknis nūvoda Lūznovys muižā

Sastdiņ, 3. junī, 19 stuņdēs, Rēzeknis nūvoda Lūznovys muižā vosorys sezonys atkluošona ar zaļumballi suoc palikt par tradiceju. Itūreiz “Latgolys zaļumballi” īskandynuos Rēzeknis pyutieju kvartets, turpynuos Igauņu saimis kapela, sovpus nūslāgumā energiski izklaidēs grupa “Vectēva papirosi”. Zaļumballis apmaklātuojim byus vareiba iz vītys nūpierkt korstuos maizeitis (panini) i dzierīņus, tok sevkurs teik aicynuots ari jimt leidza sovu piknika grūzu, pledu i kaidu pretūdu leidzekli. Biletis var nūpierkt ITE i iz vītys muižā.

Aktivitatis vysys dīnys garumā i balle vokorā Rēzeknē

Sovpus Rēzeknē sastdiņ, 3. junī, Kovšu azara pludmalē vysys dīnys garumā vysai saimei byus vareiba īsasaisteit sportiskuos aktivitatēs pasuokumā “Aktīvā tūrisma diena”, vaira informacejis par pasuokumu daīmams ITE. Piečuok, 19 stuņdēs vokora, jaunuo Rēzeknis kulturvīta “Rancāna pogolms” aicynoj asynuot pruotu i pīsadaleit “Pruota spēlēs”, vaira informacejis ITE. Bet vokora nūslāgumā, 21 stuņdēs, Rēzeknis Kulturys i atpyutys parkā (Raiņa īla 29a) byus vareiba īdoncuot vosorā ar grupu “Ginc un Es”. Īeja bez moksys.