Kazimirs Adamovičs ruodeis aktermuokslys prasmis Leigū festivalā Vyškūs
Rokstu sagataveja: portals lakuga.lv
23. junī 20.00 stuņdēs Augšdaugovys nūvoda Vyšku pogostā ar vierīni tiks svieteiti Juoni. Itūgod svātku pasuokuma golvonais varūņs ir Kazimirs Adamovičs, kura aizdavums byus puorbaudeit sovys prasmis kinys muokslā, informej pasuokuma organizatori.
Augšdaugovys nūvoda Vyšku pogostā Juoņa dīnys svieteišona kai poši organizatori tū sauc – Leigū festivalā – plotuokā mārūgā aizsuokta jau 2012. godā, kod nu jauna tyka atkluota izremontātuo Vyšku estrade, stuosta vīns nu pasuokuma organizatoru, Augšdaugovys nūvoda pošvaļdeibys īstuodis “Taka” direktors Rolands Gradkovskis.
“Pyrma 2012. goda Vyšku estradē ari nūtyka Juoņu svieteišona, tok taidā pogosta mārūgā. Piec estradis atjaunuošonys gribiejom leiguošonys pasuokumu paceļt augstuokā leiminī. Pyrmī pasuokuma godi beja izteikti tautyskā stilā, tod ar laiku dabuojom leluoku organizatoriskū pīredzi i roduos ari ideja par kolhoza tematikys apspieliešonu, tai dzyma Kazimirs Adamovičs, kurs kotru godu īsasaisteja cytaiduokuos aktivitatēs. Mes poši naceriejom, ka festivals ar laiku dabuos tik lelu atsauceibu. Itūgod temys tyka maineitys vairuokys reizis, vys beiguos palykom pi tuo, ka Kazimirs raudzeis sovys prasmis kinys industrejā,” stuosta Rolands Gradkovskis, kurs kūpā ar Vyšku pogosta puorvaļdi, īsaisteitajim akterim i cytim nūzaris specialistim ir ari vīns nu scenareja autoru.
23. junī jau nu 19 stuņžu pasuokuma apmaklātuojim byus vareiba izgaršuot vysaiduokus Juoņa dīnys gordumus, pīsadaleit vaiņuku peišonys meistarklasēs, izmontuot piertnīku pīduovuojumus. Byus daīmama ari telšu piļsieteņa, kab ļustēt da reita gaismai.
Izvadumā itūgod pīsadaleis Ilona Bagele, Normunds Rutulis, Andris Baltacis, Sandis Ulpe, grupa “Miggla”, ansamblis “Stage On”, deju kūpa “Pilskalne”, gaismys spēlis ar “ARS-V” i guņs šovs ar “Fire Show Studio”. Golvonajuos lūmuos Ritvars Gailums i Jūlija Ļaha.
Beletus var nūpierkt Augšdaugovys nūvoda pošvaļdeibys īstuodē “Taka”, Vyšku pogosta puorvaļdē, Daugovpiļs Turisma informacejis centrā i “Biļešu paradīzis” kasēs i sātyslopā ITE.
