Rokstu sagataveja: portals lakuga.lv

14. junī nu 10.00 da 16.00 stuņžu Preiļu Golvonajā bibliotekā nūtiks seminars “Ieteikumi un veiksmes stāsti kulināro ekspedīciju organizēšanā un mutvārdu liecību dokumentēšanā”, viestej informaceja Preiļu nūvoda sātyslopā. Iz seminaru teik aicynuoti bibliotekari, stuostnīku kūpys daleibnīki, školāni i sevkurs interesents, kuram ir svareiga i interesanta Latgolys kulinaruo montuojuma, apvydvuordu tema.

Seminarā par pīna nūzeimi senejuo i myusu dīnu latgalīša dzeivē stuosteis Rēzeknis Tehnologeju akademejis asociātuo profesore Angelika Juško-Štekele, ar Latgolys kulinaruo montuojuma nūzeimi īpazeistynuos lauku sātys “Upenīte” saimineica Inese Survilo, sovpus pīredzē par kulinaruo montuojuma dokumentiešonu i interpretacejis vareibom daleisīs iedīņa kulturys pietneica Astra Spalvēna. Ūtrei seminara daļa tiks veļteita izlūksnem i apvydvuordim kai volūdys boguoteibai. Par tim stuosteis Latvejis Universitatis Latvīšu volūdys instituta direktore, vodūšuo pietneica Sanda Rapa i vodūšuo pietneica Anna Vulāne, kai ari pīredzē daleisīs apvydvuordu vuociejis nu Preiļu nūvoda – Silvija Assare i Renāte Stikāne.

Pylna seminara programa ITE, pīsasaceišonys anketa ITE.

Seminars teik organizāts kai daļa nu projekta “Pienu ēdu, pienu dzēru!”, kū realizej ar Vaļsts kulturkapitala fonda mierkprogramys “Latviešu vēsturisko zemju attīstības programma” finansialu paleigu. Kai viestej Preiļu Golvonuo biblioteka, projekta kulinaruo tema – pīns – izvālāta, jo Preiļūs taisa sīru i tūs sauc par Latvejis sīra golvyspiļsātu. Preiļu nūvods ir boguots ar zemnīku saimisteibom, kuruos nūsadorboj ar pīnsaimisteibu.

Gastronomiskuos tradicejis laika gaitā puorsamej, pat pagaist, partū Preiļu Golvonuo biblioteka sadarbeibā ar cytom nūvoda bibliotekom aicynoj daleitīs sovūs stuostūs par tik tradicionaluo i nūzeimeiguo produkta izmontuošonu senejuos iedīņu receptēs. Caur pīna temu atsakluoj ari latgalīšu volūdys boguoteiba i dažaideiba. Sipisnīks, pakraiškys, ryuguļs, blyugžyns, asuškys, zacirka – tī ir tik daži nu daudzveideigūs pīna produktu, iedīņu nūsaukumu. Kotram nūvodam, pat pogostam ir rakstureigys na tik sovys gastronomiskuos tradicejis, tok ari apvydvuordi, kas laika gaitā puorsamej, vaira nateik lītuoti i pat pagaist. Partū meklejūt, apzynojūt i dokumentejūt Preiļu nūvoda kulinaruos pīna tradicejis vītejuos kūpīnuos, ekspedicejis grupa īpazeis, fiksēs i apkūpuos ari apvydvuordus, kas ir svareigs i nūzeimeigs volūdys elements.

Vosorā projekta dorba grupa, bibliotekari, nūvodpietnīceibys entuziasti, stuostnīki i cyti interesenti dūsīs stuostu vuokšonys ekspedicejuos pa Preiļu nūvodu. Sovpus rudinī padareitū prezentēs nūslāguma pasuokumā “Pienu ēdu, pienu dzēru!”, kur daleisīs stuostūs, īpazeis latgalīšu rūtaļdaņčus i dzīsmis kūpā ar folklorys kūpu “Rūtoj”, kai ari dorbuosīs kulinarajā meistarklasē kūpā ar Ināru Liepiņu.