Rokstu sagataveja: portals lakuga.lv

Sovu pyrmū dzīsmi “Tymsys” publiciejs muzika Edija Rancāna jaunais skaņu i muzykys projekts “Vuordi”, kura mierkis ir izsaceit īškejuo pasauļa sajiutys i puordzeivuojumus. Edijs stuosta, ka jau pavysam dreiži byus dzierdama ari nuokušuo dzīsme, bet piec kaida laiceņa ari gaidoms kas leluoks.

Lai ari “Vuordi” ir pavysam jauns projekts, “Tymsys” i cytys dzīsmis saraksteitys jau pyrma kaida laika, tok tagad asūt sajiuta, ka ir laiks koč kū nu tuo vysa publicēt. “Varu saceit, ka dūmys dzīsmem ir dažaidys, bet pamatā “Vuordu” muzykys mierkis ir vairuok runuot par emocionalū pasauli, trauksmem, panikys lēkmem i vysu puorejū, par kū cylvāki bīži viņ nagryb runuot i lobpruot gryb nūglobuot, it eipaši reizem nu seve. Dzīsme “Tymsys” ir par cylvāka eseibu kūpumā. Vysom sajiutom. Kai lobom, tai švakom. Par spākim i naspākim, kurūs juouzvar kasdīnā. Par tū, ka laiks nastuov iz vītys, eipaši breižūs, kod vyss ir labi. I taipat kai laiks – cylvāki ari nastuov iz vītys, i vyss ir maineigs. Kas vīnam lobs, ūtram švaks. Kotrys gryb byut par sevi. Kotrs gryb uzvarēt sovys bailis,” tai Edijs Rancāns.

Projektā “Vuordi” cikom kas jis dorbojās vīns pats, tok dzīsmis audio apstruodi taisejs Guntars Poplavskis. Dzīsmi “Tymsys” var klauseitīs Spotify, iTunes, Amazon music, Deezer, YouTube i cytuos platformuos.