Rokstu sagataveja: portals lakuga.lv

Kulturys īsacejumus itai nedeļai pīduovoj rakstneica Lelde Jauja, kuruos dzymtuo puse ir Leivuons. Skaiteituojim jau labi zynoms Leldis debejis dorbs “Vīrs, bērni un pieci randiņi” (2020), tok taišni tikū nu tipografejis sagaideits juos ūtrais romans “Pārēšanās ābece”. Lelde mums vysim īsoka nūbraukt iz Leivuona Stykla i amatnīceibys centru, izbaudeit eistynu Latgolys večerinku i apdūmuot par kaidys dzejis ryndys iztetoviešonu.

Leivuona styklys i skaistuo ainova

Cikom ceļojūšuo Leivuona stykla izstuode “Stikla sajūta” apsaverama Līpuojis muzejā, Leivuona stykla i amatnīceibys centrā apsavieršonys vārtys ir i Latvejis Muokslys akademejis stykla muokslys studentu dorbu izstuode “Smalkā frakcija” (16.06.2023–09.09.2023), i Sandys Mālniecis gleznīceibys izstuode “Krāsu slepenā dzīve” (17.06.–21.07), i pats Leivuona stykla i amatnīceibys centrs i tuo apleicīne gleznainajā vītā, kur Dubna ītak Daugovā.

Latgolys večerinka

Vīna nu paguojušuos vosorys spylgtuokūs nūtikšonu maņ beja izadoncuošona Rogovkys večerinkā “O, bļaka!”, partū eistuo vīta, kur byut itymā nedeļgolā, ir Latgolys večerinka Silinē. Vaira par tū var izzynuot ITE.

Iztetovēt dzejis ryndys

Īsadvasmuodama nu tuo, ka tikū asu tykuse pi sova pyrmuo tetoviejuma, īsoku izalaseit kaidys breineigys Latgolys dzejneicys, pīmāram, Ingys Pizānis dzejis ryndu i tū sev iztetovēt labi radzamā vītā, kab pošai/m i cytim prīca. Ryndys, kū iztetovātu es:
vajag nedaudz laika, lai atkal panāktu sevi
Atpakaļceļu nezināju. Lai to atrastu, nācās apmaldīties.
Kamēr meklējam, mēs pazaudējam visvairāk.
Visintīmākā vieta cilvēkā ir viņa brīvība.