Rokstu sagataveja: portals lakuga.lv

Apvīneiba “Latgalīšu Reps” klauseituojim pīduovoj jaunu dzīsmi “Latgalita”, kas radeita kūpā ar Felipi Gabrielu – Latvejā zynomu influenceri, blogeri i akteri nu Brazilejis, informej muziki.

“Latgalīšu Reps” daleibnīks Didzis Kozlovs pīmiņ dzīsmis tapšonys suokumu: “Sadarbeiba ar Felipi Gabrielu roduos nagaideitai, jam izsokūt gribiešonu dzīduot latgalīšu volūdā. Ilgi nadūmojūt, izsprīdem, ka tys byutu kai lobs izaicynuojums jam, tai breineiga vareiba mums atsvaidzynuot myusu repertuaru i kuortejū reizi atguodynuot par sevi.”

Videoklipā nūtikšonys rysynojās ap Latgalitu – valdzynūšu, maigi dzieleigu i naatvairamu. Itai var raksturuot dzierīni, kurū ražoj golvonī varūni – Didzis, Ivo i Felipe.

Tok stuosts īsagrīž ar paviersīni, kas nūstruodoj pret pošim personažim ar ironiski biedeigom beigom. Latgalita ir na tik dzierīņs, tok ari īfiltrāta specdīnasta inspektore (videoklipā Sanda Dejus), kas burtiski apbur puišus ar sovu valdzynūšū humora izjiutu, maigū flirtu i naatvairamū skatīni. Jai izadūd atmaskuot seņ nanūgiunamu nalegaluo alkohola karteli. Niu puiši nu favelys var dzīduot sovu “meilys miksteipu” aiz restu.

“Latgalita” videoklipa idejis autors, operators i režisors ir Elvis Lācis, producents – Andris Fridrihsons. Dzīsmis autori i vokals – Ivo Grigalis, Didzis Kozlovs, Felipe Gabriels. Dzīsmis skanis apstruodi taiseja Jānis Šmediņš (PrimeTime Latvia).