Grupai “Laimas Muzykanti” jauns albums “Turu buru!”
Rokstu sagataveja: portals lakuga.lv
Daugovpilī dybynuotuo etnomuzykys grupa “Laimas Muzykanti”, kas dreiži svieteis sovu 30 godu jubileju, izdavuse sovu jaunū albumu “Turu buru!”, viestej grupys publicātuo informaceja.
“Turu buru!” ir grupys catūrtais studejis albums. 2003. godā izdūts grupys pyrmais albums “Gonam gona”, 2007. godā “Orkla bolss”, bet 2015. godā “Rodi”. Jaunajā albumā īkļautys divpadsmit styla i žanru ziņā vysaiži aranžātys tautysdzīsmis. Tuos skaņ bluegrass, latino, smoguo roka i cytūs stylūs. Aranžejis taisejuši vysi grupys dalinīki kūpeiguos īrokstu sesejuos, poši īspieliejuši ari vysaidu tautu muzykys instrumentus, kū var dzierdēt albumā. Izmontuoti naviņ tradicionalī elektriskī i akustiskī skotivis instrumenti, nu ari buzuki, īru flautys, mandolinys, akordeons i c.
Grupys liders Artūrs Uškāns par albumu stuosta: “Albuma “Turu buru!” muzyka roduos vairuoku godu laikā grupys rodūšajuos nūmetnēs, turūt nūceju, ka tys tiks izdūts iz grupys 25 godu jubileju, tok vys tik liktiņam i pandemejai beja sovi plāni. Juosoka paļdis Andram Alviķam, kurs divejus godus pa aili atvēlēja sovu vosorys sātu Vydzemē grupys rodūšajim dorbim i munai krystameitai Evitai, kua ir vīnu vosorys nedeļu daškeire lauku sātu Latgolā. Varbyut deļtuo albumā dzieržama vysa Latvejis nūvodu tautys muzyka. Vēļ ir svareigi, ka itys albums nu īprīškejūs, kur aranžejis i apdaris taiseju es pats, atsaškier ar tū, ka padareits kūpejā aranžiešonys dorbā, kas radeja daudz rodūšūs dūmstarpeibu i ari grupys dalinīku maiņu – vysā albuma īrokstūs pīsadalejuši 14 muziki, kurūs vydā ari niu Latvejā zynomuo dzīduotuoja Būū.”
Albumā “Turu buru!” divpadsmit dzīšmu vydā treis skaņ latgaliski. Taipat ite kai “bonusa” dzīsme īkļauta “Putni”, kurā pīsadola Ieva Akuratere i projekts “EtnoZoom”. “Turu buru!” daīmams popularuokajuos muzykys straumiešonys vītnēs.
Albuma radeišonā pīsadalejuši muziki: Artūrs Uškāns (grupys liders, vokals, akordeons, stabulis, dūdys, tausteni), Matīss Uškāns (bundys), Baiba Ērgle (vokals), Armands Varslavāns (gitara, buzuki), Inga Zeile (vejūle, vokals), Tatjana Gruničeva (bass), Ilze Fārte (vokals), Kristaps Strods (bass), Megija Zonne, Ilze Borodkina, Irbe Sedleniece i Edgars Skrāgis (bekvokali). “Turu buru!” muzykaluo materiala veiduošonā pīsadalejuse ari izcyluo muzike Sintija Šteinkopfa.
Par albuma skaņu pasaryupieja Edgars Skrāgis (JUMP SOUND), skaņa īraksteita studejuos “JUMP SOUND”, “Etnisko Skaņu Laboratorijā” i “Studijā Strops”. Par albuma vuoceņa biļdi pasaryupejuši neiroteikli i Andris i Matīss Uškāni. Albums izdūts ar Vaļsts kulturkapitala fonda atbolstu.
