Rokstu sagataveja: portals lakuga.lv

29. julī Daugovpiļs Vīneibys laukumā jau trešū reizi nūtiks festivals “Gostūs Latgolā”, kas ir Latgolys gostmīleibys, kulturys i tradiceju svātki, viestej Daugovpiļs piļsātys pošvaļdeibys turisma atteisteibys i informacejis agentura.

Nu 10 da 18 stuņžu pošā Daugovpiļs piļsātys centrā Vīneibys laukumā byus vareiba izgaršuot, sajust, izbaudeit i atkluot Latgolu. Vīneibys laukumā byus vysaiduokys aktivitatis, Daugovpiļs nacionalūs bīdreibu kulinarejis meistarklasis, Latgolys sātā ražuotuoju tierdzeņš, mini ZOO dzeivinīku apsavieršona, amatnīku rodūšuos darbneicys i muzykali prīšknasumi. Festivalu vadeis pazeistamais akters, kurs ir ari pyrmuo latgalīšu seriala “Fati” vīns nu golvonūs akteru – Ritvars Gailums. Golvonī festivala gosti – kapelys “Augusti” muzykanti.

Kai stuosta ekspozicejis “Šmakovkys muzejs” puorstuovs Raivis Malnačs, itūgod izsvors teik lykts iz Latgolys daudzveideigū kulinarū montuojumu, deļ tam festivala laikā septeņu dažaidu nacionalūs bīdreibu (latvīšu, krīvu, latgalīšu, boltkrīvu, leitovīšu, pūļu i ebreju) kūpīnys ruodeis sovys kulinarejis prasmis i īsaisteis darbneicuos ari festivala apmaklātuojus.

Taipoš teik plānuotys ari cyta veida rodūšuos darbneicys, tymā storpā karteņu veiduošonys darbneica EBRU tehnikā, muola gluozeišu i spīdūgu veiduošona, kūkgrīzumu, meldru pynumu darbneica, kai ari eipaši itam festivalam paradzāta latgalīšu volūdys rodūšuo darbneica, kuru pīduovuos latgalīšu kulturys kusteiba “Volūda”. Kai stuosta kusteibys puorstuove Edeite Laime, darbneicā byus aktivitatis leluokim i mozuokim festivala gostim – mozuokī varēs poši izkruosuot pyrmuo latgalīšu komiska “Sunāns breiveibā” varūņus, bet leluokī izspēlēt latgalīšu golda spēli “Čipierkstneits”, vuiceitīs i puorbaudeit sovys zynuošonys latgalīšu rokstu volūdā, kai ari paraudzeit sovus spākus rodūši dorbojūtīs i veidojūt pošim tekstus latgaliski kūpā ar dzejneicu Guntu Ločmeli.

Dīnys parāds:

10–18 – tierdzeņš Vīneibys laukumā
11.40–12 – festivala atkluošona
12–16.30 – nacionalūs bīdreibu prīkšnasumi i kulinarejis meistarklasis
11–15 – latgalīšu volūdys darbneica
12–16 – mini ZOO dzeivinīku apsavieršona
10–18 – amatnīku rodūšuos darbneicys
16.30–17.30 – baikeru īsarašona
16.30-17.30 – kapelys “Augusti” koncerts.

Festivalu organizej Daugovpiļs piļsātys pošvaļdeibys turisma atteisteibys i informacejis agentura sadarbeibā ar ekspoziceju “Šmakovkys muzejs”.