Rokstu sagataveja: portals lakuga.lv

Tikū sovus piļsātys svātkus nūsvieteja Ludza, bet itamā nedeļā vēļ vīni svātki tīpat Ludzys nūvodā – vysi gosti teik aicynuoti iz Kuorsovys piļsātys svātkim, kas teik saukti ari par Reitupis svātkim. Itūgod Kuorsova svietej 95 godu svātkus, deļtuo kulturys īsacejumus nedeļai sagatavejuse Kuorsovys kulturviesturiskuo centra “Līču mājas” puorstuove Katrīna Ločmele.

Kuorsovai 95

Itūgod Kuorsovai teik svieteita 95 godu jubileja! Suoksim svineibys jau pīktdiņ, 18. augustā, ar jauneibys svātkim, koncertu i balleiti kūpā ar DJ Deilu. Sastdiņ pa dīnu byus jaundzymušūs gūdynuošona, bierneibys svātki i ari rodūšuo darbneica pi “Līču mājām”, bet sastdīnis vokorā piļsātys dzeivuotuoji i gosti meili aicynuoti iz svātku koncertu stadionā. Piec tuo svātku guojīņs nūvess iz piļsātys estradi, kur svynātuojus sagaideis grupys “Tautumeitas” i dzīduotuoja Žorža Siksnys koncerts. Sveiteisim, prīcuosimīs i baudeisim vysys nakts garumā!

Gostūs “Līču mājās”

Ka vēļ naesi īspiejs apsavērt Kuorsovys kulturviesturis centra “Līču mājas” pastuoveigū ekspoziceju, aicynojam tū izdareit piļsātys svātku nedeļā. Itūšaļt centrā var apsavērt ari vēļ divejis izstuodis – Kuorsovys muzykys i muokslys školys absolventu nūslāguma dorbus i Kuorsovys daudzfunkcionaluo socialūs pakolpuojumu centra rodūšūs dorbus.

“Līču mājas” gostus gaida ūtardiņ, trešdiņ, catūrtdiņ, pīktdiņ nu 10 da 17 stuņžu, bet sastdiņ nu 10 da 15 stuņžu. Svātdiņ i pyrmūdiņ centrs apmaklātuojim slāgts.

Kuorsavīši ir tierguotuoju tauta!

Kuorsovys tierga tradicejis ir tyvai pi 200 godu senejis, kod grafs Šadurskis Kuorsovys mīstam daškeire tīseibys tierguotīs. Ari niu myusu dīnuos Kuorsovā nūteik tierguošonuos. Sastdiņ vysys dīnys garumā gaidoms sātā ražuotuoju i amatnīku tierdzeņš, bet svātdīnis reitā tradicionalais Kuorsovys lelais tiergs, kurā tierguotuoji i piercieji sasateik vaira nakai kilometru garā preču pierkšonā i puordūšonā.