Rokstu sagataveja: Edeite Laime, portals lakuga.lv

Sapyni, sapynuošona i tūs eistynuošona – ar itaidu motivu sastdiņ, 19. augustā, Bolvu nūvoda Upītē tyka atkluots renovātais Namaterialuos kulturys montuojuma centrs “Upīte”, kurā niu byus lobīkuortuotys i plotuokys telpys naviņ kulturys nūtikšonom, bet ari bibliotekai i muzejam.

Sastdīnis piecpušdīnē pošā pīrūbežā, Bolvu nūvoda Upītē, kurys kulturtelpa nu 2018. gods ir īkļauta nacionalajā namaterialuos kulturys montuojuma sarokstā, beja sasapuļciejuši pulka ļaužu, kab byutu kluotyn renovātuo Namaterialuos kulturys montuojuma centra “Upīte” atkluošonā. Koč kaidu vārā jemamu remontu sāta nabeja pīdzeivuojuse nu tuos izceļšonys laika ap 1960. godu.

Kai latgalīšu kulturys ziņu portalam stuosteja Namaterialuos kulturys montuojuma centra “Upīte” direktors Andris Slišāns, centra sāta 1960./61. godā speciali projektāta i calta kai kolhoza administrativuo sāta i klubs vysaidom nūtikšonom. “Jau 70. godūs suoce ceļt vysur vīnaidus kulturys nomus, bet itys beja pyrma tuo. Kod kolhozi likvidejuos, vaļde lēme, ka juonūdūd privatizacejai. Bet Upīte ir vīta, kur vysod jaunīši ir īsasaistejuši procesūs, i tuo laika jaunīši, kurim niu ir ap 50 godu, savuoce parokstus i īsnēdze vaļdei, lai tū klubu paduovynoj pogostam. Tai i izdareja – klubs palyka pogostam, niu nūvodam. Cytaiž navar zynuot, kas niu ite byutu. Kod mes suocem te struoduot 2007. voi 2008. godā, reizi nu reizis koč kū remontiejom, bet taipat sāta palyka našmukuoka i našmukuoka,” par kluba viesturi stuosta Andris.

Tuoļuokū ceļu iz renovaceju sovā sveicīņa runā īzeimuoja Bolvu nūvoda pošvaļdeibys vadeituojs Sergejs Maksimovs – vyss suocīs ar tuo laika Saeimys deputata Juoņa Trupovnieka daškiertajim leidzeklim renovacejis projektam, piec kura izstruoduošonys maklāts finansiejums pošai renovacejai. Piečuok Latvejis, Leitovys i Boltkrīvejis puorrūbežu sadarbeibys programā sajimts renovacejis projekta atbolsts, tok 2020. goda nūtikšonu Boltkrīvejā deļ ar prezidenta vieliešonu rezultatu viltuošonu, programa darbeibu apturiejuse. Otkon maklāts finansiejums, kas golā daškierts VARAM atbaļsteitajā Vaļsts investiceju projektā, bet leidzfinansiejumu nūdrūsynuojuse Bolvu nūvoda pošvaļdeiba. Renovacejis izmoksys nu pyrmuo pasludynuotuo byuvnīceibys konkursa, kur tuos plānuotys ap 380 tyukstūšom eiro, golā jau catūrtajā byuvnīceibys konkursa reizē, kod projekts dabuojs finansiejumu, pīaugušys da gondreiž 850 tyukstūšom eiro, īskaitūt nūdūkļus. “Ka jums ir sapyns, tod eistynojit tū šudiņ, cytaiž reitu var byut jau sešys reizis duorguok,” stuosta nūslāgumā ar smaidu sacynuoja nūvoda vadeituojs.

Taipat jis pīzyna, ka ir bejs ari daudzi puormatumu, ka centram renovaceju navajagūt. “Škilbānu pogostā ir aptyvai 1000 dzeivuotuoju. Tys, ka vīnā pogostā vajadzeigi treis kulturys nomi – Rekovā, Upītē i niu ari Škilbānūs atdzymstūšuo muiža – nu molys var ruodeitīs glupums, bīži daīt pamatuot, deļkuo tys vys tik ir vajadzeigs, deļkuo Andris ar folklorys kūpu navar dzīduot, par pīmāru, Škilbānūs. Īšona iz mierki – Namaterialuos kulturys montuojuma centra “Upīte” atdzimšona – ir gars stuosts.”

Kai Sergejs Maksimovs, tai i Latvejis Nacionaluo kulturys centra namaterialuo kulturys montuojuma eksperte Gita Lancere sovuos runuos atzeimuoja, ka jī tyc, ka itys nav viņ niulinejuos Namaterialuos kulturys montuojuma centra “Upīte” komandys sapyns par renovaceju, ka tys ir nūvodpietnīka, literata, folklorista, kurs dorbuojīs ite i bejs aizsuokums taidam Upītes stuostam, kaidu pazeistam niu, Ontona Slišāna sapyns.

“Ļauds, kuri radejuši Upītis kulturtelpu kai namaterialuo montuojuma kulturys vierteibu ir Ontons Slišāns, ir Mikeļs Jermacāns, tī ir jūs dūmu i laika bīdri. Jī guoja ar sovu vieju, ar sovu puorlīceibu. Jī nabeja ārti. Dūmoju, ka ari Andris niu nav cīši ārts, jam byus sovi guojīni, sovys idejis. Taišni deļtuo, ka ir jis, juo dūmubīdri, ir taidi ļauds apleik, Upīte ir i turīs,” tai Gita Lancere.

“Tycu, ka ari Andris sepinēja, bet atsaļaunu sprīst, ka itys beja Ontona sapyns, kas šudiņ ir pīsapiļdejs. Ir juosalepoj ar tim cylvākim, kurim ir, kas jūs dorbus turpynoj. Ontons var byut prīceigs i laimeigs, ka juo dorbi turpynojās. Ontons beja vīns nu vysu vaira nasaprastūs cylvāku Upītē. Jū bīži nasaprota, deļkam jis tū dora, kam jam tū vajag i atsaļaušu saceit, ka tei ir izcyla cylvāka pazeime. Šudiņ mes svietejam svātkus ari Ontonam,” saceja Sergejs Maksimovs.

Namaterialuos kulturys montuojuma centra “Upīte” atkluošonā piec renovacejis sveicieju vydā beja ari Bolvu centraluos bibliotekys vadeituoja Ruta Cibule, Bolvu nūvoda deputats Jānis Trupovnieks, bejušais Vidis aizsardzeibys i regionaluos atteisteibys ministrs Juris Pūce, Jelgovys nūvoda pošvaļdeibys vadeituojs Madars Lasmanis, Bolvu nūvoda kulturys puorvaļdis vadeituoja Rudīte Krūmiņa, centra renovacejis projekta komanda i daudzi cyti.

Atkluošonys pasuokumā Namaterialuos kulturys montuojuma centra “Upīte” direktors Andris Slišāns īsajuta Zīmyssvātku veceišu tālā, simboliski nūruodūt iz breinumu nūtikšonu, par kaidu poši uzskota ari pošu centra renovaceju, bet ar prīšknasumim atkluošonys pasuokumā uzastuoja folklorys kūpa “Upīte”, grupa “Unknown Artist” i apvīneiba “Naktenīks un Reiti”.

Runojūt par renovātuo centra saturu, Andri Slišāns portalam lakuga.lv stuosta: “Ite vysod ir bejuse biblioteka, jau Ontona Slišāna laikūs. 1996. godā jis sataiseja mozu muzejeņu i gribēja jau tod akreditētīs, kab tū izdareitu, muzeju puorjēme nūvods, nu tai i tys da gola nasaguoja. Eisi pyrma pandemejis mums akreditaceja saguoja, bet ar sūlejumu, ka muzeju izremontēsim. Tautys noms ite vysod ir bejs, i vysūs laikūs vysmoz vīns pasuokums godā ite ir nūtics, kas ir bejs vysmoz karnevals – vacuokais pasuokums, kas ite bejs i nūteik jau nu kluba izceļšonys, viņ pandemejis laikā daguoja izlaist.”

Kai tys beja īprīšk, ari niu NKMC “Upīte” byus treis strukturvīneibys – biblioteka, Ontona Slišāna muzejs i tautys noms. Vysu leluokuos puorvierteibys pīdzeivuojs taišni muzejs, partū ka tam niu byus plotuokys telpys, byus vareiba izvītuot kai pastuoveiguos, tai i maineiguos ekspozicejis, taipoš ir izveiduotys kruojuma telpys ar tom paradzātū klimata kontroli. NKMC “Upīte” dorbojās ari vairuoki bārnu i jaunīšu puļceņu vadeituoji.

“Niu centrs ir atkluots, tok ar tū vēļ nasabeidz – turpynojās “Svātki Upītē”, 16. septembrī byus festivals “Upītes Uobeļduorzs”, vēļ gribīs uzlobuot dažus seikumus, kū plānuots da septembra vyda dabeigt. Asu prīceigs par padareitū, mums ari beja cīši lobs, preteimā īmūšs byuvnīks. Īsavuokšana ar muzeju vys byus lānuoka nakai izavuokšona. Atpakaļ vuoksimīs lānai, pruoteigi, vysu puorškirojūt, tys varātu īt da goda beigu, varbyut pat ilguok. Biblioteka pyrmuo īsavuoks atpakaļ, tod jau i muzejs,” tuoļuokū dorbu īzeimoj Andris.

Vaicojūt, voi niu ir kaidi jauni sapyni, kū pīpiļdeit, Andris nūsmej, ka jim ar Vileks Romys katuoļu draudzis pravestu Guntaru Skutelu, kurs ir ari folklorys kūpys “Upīte” dalinīks i pasuokumā īsvieteja renovātū centru, asūt sapyns par bazneicys ceļšonu, tok cytaiduoku nakai vysi varbyut īsadūmoj.

Fotogalerejā: renovātuo Namaterialuos kulturys montuojuma centra “Upīte” atkluošona, foto Edeite Laime/portals lakuga.lv